వారాహి వారి రెండు రెళ్లు ఆరు

నిర్మాతగా చాలా తక్కువ సమయంలో మంచి పేరు సంపాదించాడు సాయి కొర్రపాటి. తొలి సినిమా ‘ఈగ’తో మొదలుపెట్టి.. చివరగా ఆయన నిర్మించిన ‘జ్యో అచ్యుతానంద’ వరకు ప్రతి సినిమాలోనూ సాయి కొర్రపాటి అభిరుచి కనిపిస్తుంది. ‘జ్యో అచ్యుతానంద’ తర్వాత జగపతి బాబు హీరోగా ‘పటేల్ సార్’ అనే సినిమా ‘వారాహి చలనచిత్రం’ నుంచి రాబోతున్న సంగతి తెలిసిందే. ఈ సినిమా ఆరంభానికి ముందే టీజర్ లాంచ్ చేసి తన ప్రత్యేకతను చాటుకున్నాడు సాయి కొర్రపాటి. ఇప్పుడు సాయి సమర్పణలో ఓ కొత్త సినిమా వస్తోంది. దాని పేరు.. రెండు రెళ్లు ఆరు. జంధ్యాల తీసిన క్లాసిక్ మూవీ పేరు పెట్టుకుని వస్తున్న ఈ సినిమాకు పని చేస్తున్న వాళ్లందరూ కొత్తవాళ్లే.

అనిల్-మహిమ జంటగా నటిస్తున్న ‘రెండు రెళ్లు ఆరు’కు నందు మళ్లెల దర్శకత్వం వహిస్తున్నాడు. ప్రదీప్ చంద్ర.. మోహన్ నిర్మిస్తున్నారు. ఇక టీజర్ విశేషాల్లోకి వస్తే.. ఓ పెళ్లిని చెడగొట్టడానికి అబ్బాయి తండ్రి.. అమ్మాయి తండ్రి ప్రయత్నం చేయడం చూపించారు. మా అబ్బాయి జాతకం బాగోలేదని చెప్పండి అని అతడి తండ్రి.. మా అమ్మాయి జాతకం బాగోలేదని అమ్మాయి తండ్రి వేర్వేరుగా పంతులకు చెబితే.. ఆ పంతులేమీ మనమీద నింద ఎందుకు అవతలి వాళ్లపై తోసేద్దాం అంటాడు. ఇద్దరు తండ్రులు పంతులు మీద ఇంతెత్తున లేస్తారు. ఆ తర్వాత హీరో హీరోయిన్ల సయ్యాటలు చూపించారు. ‘‘దేవుడు జతపరిచిన దాన్ని మనుషులు వేరు చేయరాదు’’ అన్న ఫినిషింగ్ లైన్ తో టీజర్ ముగిసింది. టీజర్ చూస్తే ఇది క్లీన్ ఫ్యామిలీ అండ్ లవ్ ఎంటర్టైనర్ లాగా అనిపిస్తోంది. ఈ నెల 18న ‘రెండు రెళ్లు ఆరు’ఆడియో.. ఆ తర్వాత సినిమాను విడుదల చేయడానికి సన్నాహాలు చేస్తున్నారు.



Like Us on Facebook : https://www.facebook.com/Tupakidotcom/