ప్రభాస్ సినిమాల షూటింగ్స్ రీ షెడ్యూల్..?

యంగ్ రెబల్ స్టార్ ప్రభాస్ చేతిలో ప్రస్తుతం పలు క్రేజీ ప్రాజెక్ట్స్ ఉన్నాయి. ఇవన్నీ కూడా భారీ బడ్జెట్ తో తెరకెక్కుతున్న పాన్ ఇండియా చిత్రాలే కావడం విశేషం. అందులో వచ్చే ఏడాది రెండు లేదా మూడు సినిమాలను ప్రేక్షకుల ముందుకు తీసుకొచ్చేలా ప్లాన్ చేసుకున్నారు. దీనికి తగ్గట్టుగా షూటింగ్ షెడ్యూల్స్ వేసుకున్నారు. అయితే ఇప్పుడు అతని జీవితంలో ఏర్పడిన పరిస్థితుల కారణంగా షెడ్యూల్స్ అన్నీ ముందుకు వెళ్లనున్నాయి.

ఇప్పటి వరకూ ప్రభాస్ కు పెద్దదిక్కుగా ఉన్న పెదనాన్న రెబల్ స్టార్ కృష్ణంరాజు ఆదివారం తుది శ్వాస విడవడం అతనికి లైఫ్ లో చాలా పెద్ద లాస్ అని చెప్పాలి. తనకు ఇన్నాళ్లూ మార్గదర్శకుడిగా ఉన్న ఆయన మరణించడంతో ప్రభాస్ తీవ్ర భావోద్వేగానికి గురయ్యారు. దీన్నుంచి పూర్తిగా కోలుకోవడానికి కాస్త విరామం తీసుకుంటాడు. ఈ నేపథ్యంలో షూటింగ్ ప్లాన్స్ అన్నీ రీ షెడ్యూల్ చేయబడే అవకాశం ఉంది.

'కేజీఎఫ్' ఫేమ్ ప్రశాంత్ నీల్ దర్శకత్వంలో ప్రభాస్ హీరోగా 'సలార్' అనే సినిమా రూపొందుతున్న సంగతి తెలిసిందే. ఈ మూవీ కొత్త షెడ్యూల్ ఈ నెలలోనే ప్లాన్ చేయబడింది. అయితే ఇప్పుడు కృష్ణంరాజు మరణం తర్వాత సెప్టెంబర్ షెడ్యూల్‌ ముందుకు వెళ్లనుంది. అక్టోబర్‌ లో మాత్రమే ప్రభాస్ ఈ షూట్‌ ను తిరిగి ప్రారంభించనున్నారని తెలుస్తోంది.

అలానే ఇతర సినిమాల షూటింగ్ షెడ్యూల్స్ కూడా వాయిదా వేయబడి, రీ షెడ్యూల్ చేయబడతాయి. మారుతి దర్శకత్వంలో ప్రభాస్ ఓ మూవీ కమిట్ అయినట్లు చాలా రోజులుగా వార్తలు వినిపిస్తున్నాయి. దసరా కు ఈ ప్రాజెక్ట్ ని లాంచ్ చేస్తారని అన్నారు. కానీ ఇప్పుడు ఈ సినిమా ప్రారంభం కావడానికి ఇంకాస్త సమయం పడుతుందని టాక్ వినిపిస్తోంది.

ప్రభాస్ ఇప్పటికే 'ఆదిపురుష్' షూటింగ్ పూర్తి చేశారు. ఓం రౌత్ దర్శకత్వంలో ఈ మైథలాజికల్ డ్రామా తెరకెక్కుతోంది. రామాయణం ఇతిహాసం ఆధారంగా హై టెక్నికల్ వాల్యూస్ తో రూపొందిస్తున్నారు. ఇందులో రాఘవ పాత్రలో ప్రభాస్ కనిపిస్తారు. కృతి సనన్ హీరోయిన్ గా నటించగా.. సైఫ్ అలీఖాన్ విలన్ పాత్ర పోషించారు. ప్రస్తుతం పోస్ట్ ప్రొడక్షన్ కార్యక్రమాలు జరుపుకుంటున్న ఈ చిత్రాన్ని 2023 సంక్రాంతికి విడుదల చేయనున్నారు.

'సలార్' అనేది హై-వోల్టేజ్ యాక్షన్ డ్రామా. ఇందులో ప్రభాస్ మోస్ట్ వైలెంట్ పాత్రలో సరికొత్త లుక్ లో కనిపించనున్నారు. శృతి హాసన్ హీరోయిన్ గా నటిస్తుండగా.. పృథ్వీరాజ్ సుకుమారన్ - జగపతిబాబు కీలక పాత్రలు పోషిస్తున్నారు. ఈ చిత్రాన్ని 2023 సెప్టెంబర్ 28న రిలీజ్ చేయనున్నట్లు మేకర్స్ అధికారికంగా ప్రకటించారు.

'మహానటి' ఫేమ్ నాగ్ అశ్విన్ దర్శకత్వంలో ప్రభాస్ 'ప్రాజెక్ట్ K' అనే సినిమాలో నటిస్తున్నాడు. ఇది పాన్ వరల్డ్ మూవీ. భారతీయ భాషలతో పాటుగా పలు ఇంటర్నేషనల్ లాంగ్వేజ్ లలో రిలీజ్ చేస్తారు. ప్రభాస్ కెరీర్ లోనే కాదు.. ఇండియన్ సినిమాలో ఇది భారీ బడ్జెట్ గా తెరకెక్కే చిత్రమవుతుంది. ఇందులో దీపికా పదుకునే హీరోయిన్ గా నటిస్తుండగా.. అమితాబ్ బచ్చన్ - దిశా పటానీ కీలక పాత్రలు పోషిస్తున్నారు.

'ప్రాజెక్ట్ K' చిత్రాన్ని 2024 దసరా సందర్భంగా అక్టోబర్ 24న లేదా 2025 సంక్రాంతి కానుకగా రిలీజ్ చేసేందుకు మేకర్స్ ప్లాన్ చేస్తున్నారు. దీని కంటే ముందే మారుతి సినిమా ఉంటుంది. ఇదే క్రమంలో సందీప్ రెడ్డి వంగా దర్శకత్వంలో ప్రభాస్ కథానాయకుడిగా 'స్పిరిట్' సినిమా రాబోతోంది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.