ఈ సినిమా నుంచి కాపాడండి తల్లీ

కేంద్రంలోని విదేశీ వ్యవహారాల శాఖ మంత్రి సుష్మా స్వరాజ్ సోషల్ మీడియాలో బాగా యాక్టివ్ గా ఉంటారు. తమ కష్టం ఇదీ అని సోషల్ మీడియాలో పెట్టిన రిక్వెస్టులెన్నింటికో ఆమె స్పందించారు. రీసెంట్ గా పాకిస్తాన్ లోని రావల్పిండికి చెందిన 24 ఏళ్ల ఒసామా అలీ లివర్ ట్యూమర్ తో బాధపడుతూ తాను భారత్ కు రావడానికి మెడికల్ వీసా ఇప్పించాలంటూ కోరాడు. దానికి సుష్మా స్వరాజ్ వెంటనే స్పందించి అతడికి సహాయం అందించారు. దీనికి సోషల్ మీడియాలో మంచి రెస్పాన్స్ వచ్చింది. ఎందరో ఆమెపై అభినందనల వర్షం కురిపించారు.

తాజాగా సుష్మా స్వరాజ్ కు పుణేలోని ఓ వ్యక్తి తనను సినిమా బారి నుంచి కాపాడాలంటూ చేసిన ట్వీట్ సోషల్ మీడియాలో వైరల్ గా మారింది. బాలీవుడ్ బాద్ షా షారూక్ ఖాన్ - అనుష్క శర్మ జంటగా నటించిన జబ్ హ్యారీ మెట్ సెజల్ సినిమా ఈ వారం థియేటర్లకు వచ్చింది. ఈ సినిమా పరమ బోరింగ్ గా ఉండి ప్రేక్షకులను భయపెడుతోంది. పుణేలో ఈ సినిమాకు వెళ్లిన విశాల్ సూర్యవంశీ సినిమా మధ్యలో సుష్మా స్వరాజ్ కు ఓ ట్వీట్ పెట్టాడు. ‘మేడమ్ నేను పుణేలోని జియాన్ థియేటర్ లో జబ్ హ్యారీ మెట్ సెజల్ మూవీ చూసేందుకు వచ్చాను. దయచేసి వీలైనంత త్వరగా నన్ను ఈ సినిమా నుంచి కాపాడండి’ అంటూ ట్వీట్ చేశాడు.

బాలీవుడ్ బాద్ షా షారుఖ్ ఖాన్ అంటేనే రొమాంటిక్ ఎంటర్ టెయినర్ లకు ఓ బ్రాండ్ అంబాసిడర్. ఈ జోనర్ లో షారుఖ్ కొట్టినన్ని బ్లాక్ బస్టర్లు ఇంకెవరి వల్ల కాలేదు. ఈ మధ్య కాలంలో రకరకాల ప్రయోగాలతో వెనుకపడ్డ షారుఖ్ ఖాన్ మరోసారి తనకు అచ్చొచ్చిన జోనర్ లో ఇంతియాజ్ అలీ దర్శకత్వంలో జబ్ హ్యారీ మెట్ సెజల్ సినిమా చేశాడు. కానీ ఈ సినిమా ప్రేక్షకులను బెదిరిపోయేలా చేస్తోంది. ఇదే రేంజిలో ఉందంటే షారుఖ్ వేరే జోనర్ లో సినిమాలు ట్రై చేసుకోవడం బెటర్ అని అభిమానులంతా సలహా ఇస్తున్నారట.