రేవంత్ మాట: అలా అయితే ‘తుంటరి’ బ్లాక్ బస్టరే

నారా రోహిత్ కొత్త సినిమా ‘తుంటరి’ బ్లాక్ బస్టర్ కావడానికి మార్గం చెప్పాడు తెలుగుదేశం అగ్రనేత రేవంత్ రెడ్డి. తెలుగుదేశం అభిమానులందరూ ఈ సినిమాను రెండేసి సార్లు చూస్తే చాలని.. ఇక వేరే ప్రేక్షకులెవ్వరూ చూడకపోయినా సినిమా బ్లాక్ బస్టర్ అయిపోతుందని అన్నాడు రేవంత్. శుక్రవారం ‘తుంటరి’ ఆడియో ఫంక్షన్లో మాట్లాడుతూ రేవంత్ ఈ వ్యాఖ్యలు చేశాడు. యుఎస్ ఆర్మీ కంటే కూడా యెల్లో ఆర్మీ రెట్టింపు ఉందని.. రెండు తెలుగు రాష్ట్రాల్లో 60 లక్షల యెల్లో ఆర్మీ ఉందని.. వాళ్లందరూ సినిమాను రెండేసి సార్లు చూస్తే ‘తుంటరి’ సినిమాకు తిరుగుండదని రేవంత్ అన్నాడు.

రేవంత్ చేసిన ఈ వ్యాఖ్యలకు ఆడిటోరియం దద్దరిల్లింది. మాదాపూర్ లోని ఓ హోటల్లో ‘తుంటరి’ ఆడియో వేడుక ఆహ్లాదకర వాతావరణంలో జరిగింది. రేవంత్ మాట్లాడుతున్నపుడు రోహిత్ పక్కనే ఉండి నవ్వుతూ ఎంజాయ్ చేశాడు. తమిళ హిట్ మూవీ ‘మాన్ కరాటె’కు రీమేక్ గా వస్తున్న ‘తుంటరి’పై మంచి అంచనాలున్నాయి. ‘గుండెల్లో గోదారి’ ఫేమ్ కుమార్ నాగేంద్ర ఈ చిత్రానికి దర్శకుడు. మురుగదాస్ ఈ చిత్రానికి కథకుడు కావడం విశేషం. రోహిత్ సరసన లతా హెగ్డే అనే కొత్తమ్మాయి నటిస్తోంది. మార్చిలో ఈ చిత్రం ప్రేక్షకుల ముందుకొస్తుంది.