లెజెండ్ అమితాబ్ తో మ‌రోసారి ఆర్జీవీ బిగ్ ప్లాన్?

గ‌త కొన్నేళ్లుగా ఆర్జీవీ ముంబైని విడిచిపెట్టి హైద‌రాబాద్ లోనే సెటిలైన సంగ‌తి తెలిసిందే. ఆ త‌ర్వాత ఆర్జీవీ చేసిన సినిమాల్లో ర‌క్త చ‌రిత్ర 1-2 చిత్రాలు మిన‌హా అంత‌గా చెప్పుకోవ‌డానికేవీ లేవు. ఇటీవ‌ల వ‌రుస‌గా డీగ్రేడ్ చిత్రాలు తీస్తున్నార‌న్న విమ‌ర్శ‌లు వెల్లువెత్తుతున్నాయి. మియా మ‌ల్కోవా త‌ర్వాత ప‌లువురు భామ‌ల్ని ఢీకంపెనీలో చేర్చుకుని సినిమాలు తీస్తున్న ఆర్జీవీ వ్య‌వ‌హార శైలిపై ఒక సెక్ష‌న్ విమ‌ర్శ‌లు త‌ప్ప‌డం లేదు.

కార‌ణం ఏదైనా ఆర్జీవీ స్వభావం కారణంగా స్టార్ హీరోలు ఎవరూ అతనితో పనిచేయడానికి సిద్ధంగా లేరు. అయితే ఆర్జీవీ ఈ స‌మ‌స్య‌కు చెక్ పెట్టే ప్లాన్ తో ఉన్నార‌ని తాజాగా తెలిసింది. బాలీవుడ్ లెజెండ్ అమితాబ్ బచ్చన్ తో కలిసి ఒక క్రేజీ సినిమాని ప్లాన్ చేస్తున్నార‌ని తెలిసింది.

బిగ్ బిని దృష్టిలో ఉంచుకుని ఆర్‌.జీ.వీ స్క్రిప్ట్ రాస్తున్నారు. లెజెండ‌రీ నటుడు అమితాబ్ అనుమతి ఇస్తే ఈ ప్రాజెక్ట్ 2022 లో చిత్రీక‌ర‌ణ‌కు వెళ్లేందుకు ఆస్కారం ఉంద‌ని తెలిసింది. దీనికి సంబంధించి అధికారిక ప్ర‌క‌ట‌న రావాల్సి ఉంటుంది. గతంలో సర్కార్- త్రయం-నిశ్శ‌బ్ధ్ - ఆర్‌.జీ.వి కి ఆగ్- రన్ - డిపార్ట్ మెంట్ వంటి చిత్రాల్లో అమితాబ్ న‌టించారు. బిగ్ బికి చ‌క్క‌ని బ్లాక్ బ‌స్ట‌ర్ల‌ను అందించారు ఆర్జీవీ. అందుకే ఈసారి కూడా ఈ కాంబినేష‌న్ వ‌ర్క‌వుట‌య్యే ఛాన్సుంటుంది. అయితే ప్ర‌తిదీ స్క్రిప్ట్ డిసైడ్ చేస్తుంద‌ని భావిస్తున్నారు.