'లవ్ స్టోరీ' అనుకుంటే.. వర్మ 'దెయ్యం' వస్తోందిగా..!

వివాదాల దర్శకుడు రాంగోపాల్ వర్మ గురించి అందరికి తెలిసిందే. వర్మ అంటే వివాదాలకు అడ్డాగా చెప్పుకోవచ్చు. సోషల్ మీడియా ద్వారా సినిమాలకు ఫ్రీ పబ్లిసిటీ పొందుతుంటాడు. వర్మ తన సినిమాలన్నింటిని ట్విట్టర్ వేదికగా వరుసగా ప్రకటిస్తుంటాడు అలాగే వాటిపై అటెన్షన్ కూడా రాబడుతుంటాడు. కానీ ఎన్ని ఎక్కువ సినిమాలను ప్రకటిస్తాడో అన్ని తక్కువ సినిమాలను మాత్రమే తెరపైకి తీసుకొస్తాడు. ఈ విషయం వర్మకు కూడా తెలుసు. వర్మ సినిమాలలో దాదాపు ప్రకటనల వరకే ఆగిపోయిన సినిమాల సంఖ్య కూడా బాగానే ఉంటుంది. ఎప్పుడు ఎలాంటి సినిమాతో వస్తాడో అది మాత్రం ఎవరికి అర్ధం కాదు. ఎక్కువగా షూటింగ్స్ పూర్తి చేసుకొని విడుదల కాకుండా నిలిచిపోయిన సినిమాల్లో నుండి తాజాగా విడుదలకు ఓ సినిమాను రెడీ చేసాడు.

ఆ సినిమానే రాజశేఖర్‌ హీరోగా నటించిన 'పట్టపగలు'. ఈ సినిమాను ఇప్పుడు 'దెయ్యం'గా పేరు మార్చి రిలీజ్ చేస్తున్నాడు. నిజానికి ఈ సినిమా 2014లో షూటింగ్‌ పూర్తి చేసుకుంది. అప్పట్లో రిలీజ్ చేయనున్నట్లు వార్తలొచ్చాయి. ట్రైలర్‌ కూడా విడుదల చేశాడు వర్మ. ఎందుకోగాని సినిమా మాత్రం విడుదల కాలేదు. ఈ విషయం గురించి ఎన్నిసార్లు అడిగినా సమాధానం చెప్పలేదు వర్మ. అయితే తాజాగా అదే సినిమాను టైటిల్ చేంజ్ చేసి రిలీజ్ చేస్తుండటం పై షాక్ అవుతున్నారు జనాలు. అందులోను ఐదు భాషల్లో.. తెలుగు, తమిళ, మలయాళ, కన్నడ, హిందీ భాషల్లో ఏప్రిల్ 16న విడుదల చేస్తున్నాడు. ఇటీవలే వర్మ పుట్టినరోజున దెయ్యం ట్రైలర్‌ రిలీజ్ చేశారు. ఇదే ట్రైలర్ 2014లో రిలీజ్ చేసాడు వర్మ. ఇక్కడ అసలు విషయం ఏంటంటే.. నాగచైతన్య 'లవ్ స్టోరీ' మూవీ కరోనా భయంతో వాయిదా పడటంతో.. ఆ స్థానంలో దెయ్యం సినిమా రిలీజ్ అవుతోంది. అసలే కరోనా భయం.. అందులోను దెయ్యం అనేది హారర్ సినిమా. చూడాలి మరి వర్మ దెయ్యం ఎలా ఆకట్టుకుంటుందో!