'పెళ్లి చూపులు' రీతూ ఎందుకీ ఫెయిల్‌?

`పెళ్లి చూపులు` సినిమాతో బ్లాక్ బ‌స్ట‌ర్ విజ‌యం అందుకుంది రీతు వ‌ర్మ‌. `బొమ్మ‌రిల్లు` హాసినికి వ‌చ్చినంత పేరు వ‌చ్చింది. జెనీలియాలా పెర్ఫామ‌ర్ కాబ‌ట్టి దూసుకెళుతుంద‌నే అనుకున్నారంతా. కానీ అనుకున్న‌దొక్క‌టి అయిన‌దొక్క‌టి అన్న చందంగా రీతూ వ‌ర్మ కెరీర్ ప‌రంగా స్పీడ్ పెంచ‌డంలో ఫెయిలైంది. త‌మిళ‌నాట చియాన్ విక్ర‌మ్ లాంటి స్టార్ హీరో `ధృవ‌న‌క్ష‌త్రం`లో అవ‌కాశం ఇచ్చినా ఆ సినిమా ఇప్ప‌టివ‌ర‌కూ రిలీజ్ కానేలేదు. గౌత‌మ్ మీన‌న్ ద‌ర్శ‌క‌త్వం వ‌హిస్తున్న ఈ స్పై థ్రిల్ల‌ర్ పై ఎన్నో ఆశ‌లు పెట్టుకుంది రీతూ. కానీ ఇంత‌వ‌ర‌కూ రిలీజ్ కాలేదు. ఇక ఇదివ‌ర‌కూ రిలీజైన ధ‌నుష్‌ `వీఐపీ 2` చిత్రంలో రీతు అతిధిగా మెరిసింది. కానీ దాని వ‌ల్ల ఏ ప్ర‌యోజ‌నం లేదు.

ఇదేగాక దుల్కార్ స‌ల్మాన్ స‌ర‌స‌న `కానుమ్ కానుమ్ కొల్ల‌య‌దితాల్ `అనే చిత్రంలో న‌టించింది. ఆ సినిమాకి సంబంధించిన ఎలాంటి అప్ డేట్ లేదు నేటివ‌ర‌కూ. తెలుగు తెర‌కు పూర్తిగా దూర‌మైనందుకు క‌నీసం త‌మిళంలో అయినా టాప్ స్లాట్ కి చేరుకుందా? అంటే ఇప్ప‌టివ‌ర‌కూ రీతూ న‌టిస్తున్న సినిమాల‌న్నీ సెట్స్ పైనే ఉన్నాయి. ఆ క్ర‌మంలోనే ఈ అమ్మ‌డి సంద‌డి క‌నిపించ‌లేదు. కెరీర్ ప‌రంగా ఆశించిన‌ దూకుడు క‌నిపించ‌లేదు.

ప్ర‌స్తుతం రీతూ అతిధిగా న‌టించిన తెలుగు `మౌన‌మే ఇష్టం` రిలీజ్ కి రెడీ అవుతోంది. ఆర్ట్ డైరెక్టర్ గా దాదాపు 150 సినిమాలకు పైగా వర్క్ చేసి ఐదు నందులు గెలుచుకున్న ప్రముఖ ఆర్ట్ డైరెక్ట‌ర్ అశోక్ కుమార్ ద‌ర్శ‌క‌త్వంలో ఏకే మూవీస్ ప‌తాకంపై ఆశా అశోక్ ఈ చిత్రాన్ని నిర్మించారు. రామ్ కార్తీక్‌ - పార్వ‌తి అరుణ్ నాయ‌కానాయిక‌లు. రీతూ వర్మ కీల‌క పాత్ర పోషించిన ఈ చిత్రం మార్చి 15 న విడుదలవుతోంది. హైద‌రాబాద్ లో తాజా ప్ర‌చార కార్య‌క్ర‌మంలో క‌నిపించిన రీతూ ఓ అద్భుత‌మైన‌ రొమాంటిక్ ఎంటర్‌ టైనర్ తో కొంత గ్యాప్ తో ప్రేక్ష‌కుల ముందుకు వ‌స్తున్నాన‌ని తెలిపింది. అమ్మాయికి ఎలా ప్ర‌పోజ్ చేయాలి? అన్న పాయింట్ చుట్టూ ఈ సినిమా క‌థాంశం ఉంటుంద‌ట‌. త‌న‌ పాత్ర‌కు ఈ చిత్రంలో ప్రాధాన్య‌త ఉంద‌ని చెబుతోంది. క‌నీసం ఈసారైనా `పెళ్లి చూపులు` భామ నెక్ట్స్ లెవ‌ల్ కి వెళుతుందా.. లేదా? అన్న‌ది చూడాలి.