2.0.. వాట్ ఎ పోస్టర్

సరిగ్గా ఇంకో నెల రోజుల్లో బ్రహ్మాండం బద్దలు కాబోతోంది. సూపర్ స్టార్ రజనీకాంత్-ఏస్ డైరెక్టర్ శంకర్ ల విజువల్ వండర్ ‘2.0’ నవంబరు 29న ప్రేక్షకుల ముందుకు రాబోతోంది. ఈ సినిమాపై అంచనాలు ఏ స్థాయిలో ఉన్నాయో ప్రత్యేకంగా చెప్పాల్సిన పని లేదు. ఆ అంచనాల్ని అందుకుంటే ఇండియన్ సినిమా రికార్డులన్నింటినీ ఇది చెరిపేయడం ఖాయం. ఇప్పటికే పలుమార్లు వాయిదా పడ్డ ‘2.0’.. ఈసారి మాత్రం పక్కాగా ప్రేక్షకుల ముందుకు వచ్చేలాగే కనిపిస్తోంది. ఇంకో మూడు రోజుల్లో ‘2.0’ ట్రైలర్ కూడా లాంచ్ చేయబోతున్నారు. ఈ నేపథ్యంలో రోజుకో పోస్టర్‌ తో కౌంట్ నడిపిస్తూ హైప్ పెంచే ప్రయత్నం చేస్తోంది చిత్ర బృందం. తాజాగా దర్శకుడు శంకర్ ఒక కొత్త పోస్టర్ అభిమానులతో పంచుకున్నాడు.

అది చూస్తే ప్రేక్షకులకు రోమాలు నిక్కబొడుచుకోవడం ఖాయం. చిట్టి రోబోగా రజనీ విశ్వరూపం చూపించేస్తున్నాడు ఇందులో. ‘రోబో’లో చిట్టి ప్రతినాయకుడిగా మారాక చెలరేగిపోయే క్రమంలో రకరకాల అవతారాల్లోకి మారతాడు. దాన్ని తలపించేలాగే ఉంది ఈ పోస్టర్. ‘రోబో’తో పోలిస్తే మరింత గొప్ప విజువల్ ఎఫెక్ట్స్ తో మరంత భారీగా యాక్షన్ ఘట్టాల్ని తీర్చిదిద్దడానికి శంకర్ ప్రయత్నించి ఉంటాడనడంలో సందేహం లేదు. టీజర్ కూడా ఆ విషయంలో సంకేతాలు ఇచ్చింది. ట్రైలర్ ఇంకా భారీగా ఉంటుందని అంటున్నారు. ఈ నేపథ్యంలో తాజా పోస్టర్ అంచనాల్ని మరింత పెంచేలా ఉంది. నవంబరు 3న రిలీజయ్యే ట్రైలర్ కోసం అభిమానుల ఉత్సాహం మామూలుగా లేదు. అది బయటికి వచ్చాక సినిమాపై అంచనాలు మరింతగా పెరిగిపోతాయని భావిస్తున్నారు.