వీడియో: రౌడీ బేబీ బిహైండ్ ది సీన్స్

సాయి పల్లవి మంచి నటి మాత్రమే కాదు అంతకు మించిన డ్యాన్సర్. నిజానికి డ్యాన్స్ విషయంలో సౌత్ మొత్తంమీద సాయి పల్లవిని బీట్ చేసే హీరోయిన్లు మరొకరు లేరంటే అదేమీ అతిశయోక్తి కాదు. 'ఫిదా' లో 'వచ్చిండే' సాంగ్ ఎంత సంచలనం సృష్టించిందో తెలిసిన విషయమే. 'మారి 2' లో రౌడీ బేబీ పాట వచ్చేంతవరకూ యూట్యూబ్ లో హవా అంతా ఆ పాటదే. ఇప్పుడు సౌత్ సాంగ్స్ లో రౌడీ బేబీ 250 మిలియన్ పైగా వ్యూస్ తో మొదటి స్థానంలో ఉండగా వచ్చిండే రెండో స్థానంలో ఉంది.

ఇదిలా ఉంటే రీసెంట్ గా 'రౌడీ బేబీ' సాంగ్ మేకింగ్ వీడియో ను రిలీజ్ చేయగా అది కూడా యూట్యూబ్ లో దుమ్ముదులుపుతోంది. రిలీజ్ చేసి రెండు రోజులు కాకముందే నాలుగు మిలియన్ల వ్యూస్ వచ్చాయి. నాలుగున్నర నిముషాల నిడివి ఉన్న ఈ మేకింగ్ వీడియోలో 'మారి 2' దర్శకుడు' బాలాజీ మోహన్ ఈ సాంగ్ నేపథ్యాన్ని మేకింగ్ కు సంబంధించిన విశేషాలను పంచుకున్నాడు. కానీ హైలైట్ మాత్రం ఆయన కాదు.. ప్రభుదేవా మాస్టర్. ప్రేక్షకులను మెస్మరైజ్ చేసేలా ఈ పాటకు స్టెప్పులు కంపోజ్ చేసింది ఆయనే. ధనుష్.. సాయి పల్లవి ఇద్దరికీ డ్యాన్స్ సూచనలిస్తూ ఎక్స్ ప్రెషన్స్ ఎలా ఉండాలో వివరిస్తూ.. అతి చిన్న డీటెయిల్స్ ను కూడా మిస్ చేయకుండా స్వయంగా వివరిస్తూ కనిపించారు ప్రభు.

ధనుష్.. సాయి పల్లవి ఇద్దరూ ప్రభు మాస్టర్ డ్యాన్స్ స్టెప్పులను ఎంతో శ్రద్ధగా రిహార్సల్ చేసే షాట్స్ కూడా ఈ మేకింగ్ వీడియోలో ఉన్నాయి. వీడియో చివర్లో సాయిపల్లవి మాట్లాడుతూ ప్రభు సార్ కొరియోగ్రఫీలో డ్యాన్స్ చేయడం ఎంతో సంతోషంగా అనిపించిందని.. తన జీవితంలో ఇదో బ్యూటిఫుల్ మెమరీ అని చెప్పింది. ఇంకెందుకు ఆలస్యం ఒకసారి మేకింగ్ వీడియోను చూసేయండి.