'లైగర్' థియేటర్ వద్ద అండర్ వేర్ తో రౌడీ ఫ్యాన్ రచ్చ రచ్చ..!

సాధారణంగా తమ ఫేవరేట్ హీరో సినిమా రిలీజ్ అవుతుందంటే అభిమానులు పండుగలా సంబరాలు చేసుకుంటుంటారు. థియేటర్ల వద్ద భారీ కటౌట్స్‌ - పెద్ద ఎత్తున బ్యానర్లు ఏర్పాటు చేసి పాలాభిషేకాలు చేస్తుంటారు. ఇటీవల కాలంలో హీరో ఫస్ట్ లుక్ రిలీజ్ అయినా ఫ్యాన్స్ రచ్చ చేయడం మనం చూస్తున్నాం.

తాజాగా పూరీ జగన్నాథ్ దర్శకత్వంలో విజయ్ దేవరకొండ హీరోగా నటించిన ''లైగర్'' సినిమా రిలీజ్ సందర్భంగా అభిమానులంతా థియేటర్ల వద్ద సందడి చేశారు. భారీ అంచనాల నడుమ ముందుగానే సెలబ్రేషన్స్ కోసం గట్టిగా ప్లాన్ చేసుకున్నారు.  దీనికి తగ్గట్టుగానే సినిమా హాళ్ల ముందు డ్యాన్సులు వేయడమే కాదు.. బాణసంచా కాల్చి హంగామా చేశారు.

అయితే ఓ అభిమాని మాత్రం అందరి కంటే ప్రత్యేకంగా నిలవాలని కాస్త భిన్నంగా విజయ్ దేవరకొండ మీదున్న అభిమానాన్ని చాటుకునే ప్రయత్నం చేశాడు. 'లైగర్' సినిమాలో విజయ్ ఒక ఎంఎంఏ ఫైటర్ గా సెమీ న్యూడ్ లుక్ లో కనిపించగా.. అతని డైహార్డ్ ఫ్యాన్ కూడా అతన్ని ఫాలో అయిపోయాడు.

మిక్స్డ్ మార్షల్ ఆర్ట్స్ కథాంశంతో తెరకెక్కిన 'లైగర్' సినిమాలో విజయ్ రింగ్ లోకి దిగిన సన్నివేశాల్లో అండర్ వేర్ లో కనిపిస్తాడు. ఇప్పుడు రౌడీ ఫ్యాన్ కూడా కేవలం డ్రాయర్ తో దర్శనమిచ్చి థియేటర్ వద్ద హల్ చల్ చేశాడు. స్ట్రీట్ లైట్ పోల్ ని పట్టుకొని ఫైటింగ్ చేస్తున్నట్లుగా అత్యుత్సాహం ప్రదర్శించాడు. దీనికి మిగతా అభిమానులు అతన్ని ఎంకరేజ్ చేస్తూ 'లైగర్' స్లొగన్స్ ఇచ్చారు.

VD ఫ్యాన్ సెమీ న్యూడ్ గా సినిమా హల్ వద్ద చేసిన రచ్చకు సంబంధించిన వీడియో ఇప్పుడు సోషల్ మీడియాలో వైరల్ అవుతోంది. ఏదొక విధంగా తమ అభిమాన హీరో దృష్టిలో పడాలని వీరాభిమాని చేసిన ఈ ప్రయత్నం.. విజయ్ దేవరకొండ వరకూ చేరుతుందేమో చూడాలి.

ఇదిలా ఉంటే భారీ అంచనాల నడుమ గురువారం ప్రేక్షకుల ముందుకు వచ్చిన 'లైగర్' చిత్రానికి తొలి ఆట నుంచే మిశ్రమ స్పందన వచ్చింది. ఏమాత్రం కొత్తదనం లేని కథతో పూరీ నీరసం తెప్పించాడని కామెంట్స్ వినిపిస్తున్నాయి. విజయ్ ఈ సినిమా కోసం పడిన కష్టానికి ప్రశంసలు దక్కుతున్నాయి.

అయితే స్టోరీ వీక్ గా ఉండటం.. ఆసక్తికరమైన కథనంతో నడవకపోవడంతో విజయ్ దేవరకొండ సైతం తన పెర్ఫార్మాన్స్ తో సినిమాని గట్టెక్కించలేకపోయాడని ఆడియన్స్ అంటున్నారు. పాన్ ఇండియాని టార్గెట్ చేయడానికి ఇది సరైన సినిమా కాదని తేల్చేశారు. అడ్వాన్స్ బుకింగ్స్ ని బట్టి చూస్తే ఫస్ట్ డే టాక్ తో సంబంధం లేకుండా వసూళ్ళు నమోదు చేసే అవకాశం ఉంది.

'లైగర్' చిత్రంలో విజయ్ సరసన అనన్య పాండే హీరోయిన్ గా నటించగా.. రమ్యకృష్ణ - మైక్ టైసన్ - విషు రెడ్డి - రోనీత్ రాయ్ - అలీ ఇతర పాత్రలు పోషించారు. ధర్మ ప్రొడక్షన్స్ మరియు పూరీ కనెక్ట్ బ్యానర్లపై భారీ బడ్జెట్ తో ఈ చిత్రాన్ని నిర్మించారు.