ఆర్పీ సినిమా రెండు భాషల్లో రీమేక్?

దర్శకుడిగా తనేంటో రుజువు చేసుకోవడానికి చాలా కాలం నుంచి ప్రయత్నాలు చేస్తున్నాడు ఆర్పీ పట్నాయక్. మిగతా సినిమాల సంగతెలా ఉన్నా ‘బ్రోకర్’ సినిమా అతడికి మంచి పేరు తెచ్చిపెట్టింది. ఆ తర్వాత దర్శకుడిగా ఇంకో రెండు ప్రయత్నాలు చేసిన ఆర్పీ.. ఇప్పుడు ‘బ్రోకర్’ తరహాలోనే సామాజికాంశాలతో కూడిన సినిమాతో వస్తున్నాడు. అదే.. మనలో ఒకడు. పక్కదారి పట్టిన మీడియా మీద.. మీడియాను అడ్డం పెట్టుకుని దందాలు చేసే వ్యక్తుల మీద ఓ సామాన్యుడు చేసే పోరాటం నేపథ్యంలో ఈ సినిమా సాగుతుంది. మీడియా మొఘల్ లాంచ్ చేసిన ఈ సినిమా ట్రైలర్ పాజిటివ్ రెస్పాన్స్ తెచ్చుకుంది.

ఈ సినిమాకు సంబంధించి తాజా కబురేంటంటే.. ఇది కన్నడ.. తమిళ భాషల్లోకి రీమేక్ కాబోతోందట. ఈ చిత్రంలో కీలక పాత్రలు పోషించిన సాయికుమార్.. నాజర్ ఇందుకోసం ప్రయత్నాలు చేస్తున్నారు. సాయికుమార్ కన్నడలో.. నాజర్ తమిళంలో ‘మనలో ఒకడు’ను రీమేక్ చేయాలని చూస్తున్నారు. కాన్సెప్ట్ నచ్చడంతో వారు ఈ దిశగా ఆలోచిస్తున్నారట. ఆల్రెడీ కన్నడలో ఆర్పీ ఓ సినిమాను డైరెక్ట్ చేశాడు. సంగీత దర్శకుడిగానూ అతడికి అక్కడ మంచి పేరుంది. ఈ నేపథ్యంలో ఆర్పీ దర్శకత్వంలోనే కన్నడ రీమేక్ ను నిర్మించాలని సాయికుమార్ యోచిస్తున్నాడు. ఈ సినిమా తెలుగులో రిలీజై పాజిటివ్ రెస్పాన్స్ తెచ్చుకుంటే రీమేక్ ప్రయత్నాలు ఊపందుకోవచ్చు. ఆర్పీ సరసన నువ్వు నేను ఫేమ్ అనిత కథానాయికగా నటించిన ‘మనలో ఒకడు’ ఈ నెలాఖరులో ప్రేక్షకుల ముందుకొస్తుంది.

Like Us on Facebook : https://www.facebook.com/Tupakidotcom/