బాండ్ మూవీ కారణంగా వారం ఆలస్యంగా 'ఆర్ఆర్‌ఆర్‌'

టాలీవుడ్ జక్కన్న రాజమౌళి దర్శకత్వంలో రూపొందుతున్న భారీ మల్టీస్టారర్‌ యాక్షన్‌ ఎంటర్‌ టైనర్‌ 'ఆర్ఆర్‌ఆర్‌' సినిమా విడుదల తేదీపై స్పష్టత వచ్చింది. ఈ ఏడాది సంక్రాంతికి రావాల్సిన సినిమా కరోనా కారణంగా షూటింగ్ పూర్తి కాకపోవడంతో ఇదే ఏడాది అక్టోబర్‌ కు వాయిదా పడింది. షూటింగ్ చివరి దశకు రావడంతో పాటు పోస్ట్‌ ప్రొడక్షన్‌ వర్క్‌ కూడా చకచక జరుగుతున్న కారణంగా సినిమాను అక్టోబర్ 13న విడుదల చేయాలనే నిర్ణయానికి వచ్చినట్లుగా సమాచారం అందుతోంది. మొదట ఈ సినిమాను అక్టోబర్‌ 8న విడుదల చేయాలని భావించారు. కాని హాలీవుడ్ బాండ్ మూవీ 'నో టైమ్‌ టు డై' అక్టోబర్‌ 8న విడుదల కాబోతుంది. కనుక ఆర్ఆర్ఆర్‌ ను వారం ఆలస్యంగా విడుదల చేయబోతున్నారు.

జేమ్స్ బాండ్ సినిమాలకు ప్రపంచ వ్యాప్తంగా అభిమానులు ఉంటారు. ఇక జక్కన్న సినిమా అన్నా కూడా దేశంలోనే కాకుండా ప్రపంచ దేశాల్లో కూడా భారీ ఎత్తున విడుదల అవ్వాల్సి ఉంటుంది. కనుక జేమ్స్‌ బాండ్‌ సినిమాతో పోటీ ఎందుకు అన్నట్లుగా భావించి వారం ఆలస్యంగా విడుదల చేయాలనే నిర్ణయానికి వచ్చినట్లుగా తెలుస్తోంది. జక్కన్న గత కొంత కాలంగా తన సినిమాల విడుదల తేదీల విషయంలో వాయిదాల మీద వాయిదాలు వేస్తూనే వచ్చాడు. ఇప్పటికే ఆర్‌ఆర్‌ఆర్‌ రెండు సార్లు వాయిదా పడింది. అక్టోబర్ లో విడుదల చేసేనా లేదంటే మళ్లీ విడుదల వాయిదా వేస్తారా అనేది చూడాలి. ఈ సినిమా కోసం తెలుగు ప్రేక్షకులు.. సౌత్ ప్రేక్షకులు అని మాత్రమే కాకుండా యావత్‌ ఇండియన్‌ సినిమా ప్రేక్షకులు ఎదురు చూస్తున్నారు.