ఎన్టీఆర్ - చరణ్ సినిమాలకు వర్క్ చేయనున్న యంగ్ మ్యూజిక్ సెన్సేషన్..!

యంగ్ మ్యూజిక్ సెన్సేషన్ అనిరుధ్ రవిచందర్ తమిళంలో స్టార్ మ్యూజిక్ డైరెక్టర్ గా కొనసాగుతున్నాడు. మాస్ సాంగ్స్ - బ్యాగ్రౌండ్ స్కోర్‌ అదరగొడతాడనే పేరు తెచ్చుకున్న అనిరుధ్.. ప్రస్తుతం కోలీవుడ్ స్టార్ హీరోలందరి సినిమాలకు సంగీతం సమకూరుస్తున్నాడు. ఇక తెలుగులో 'అజ్ఞాతవాసి' సినిమాతో ఎంట్రీ ఇచ్చాడు. మ్యూజిక్ బాగున్నా ఆ మూవీ డిజాస్టర్ అవడంతో, ఆ ఎఫెక్ట్ అందరితో పాటుగా అనిరుధ్ పై కూడా పడింది. 'అరవింద సమేత' సినిమాకి మ్యూజిక్ అందించే ఛాన్స్ వచ్చినట్లే వచ్చి దూరమైంది. ఈ క్రమంలో నాని 'గ్యాంగ్ లీడర్' 'జెర్సీ' సినిమాలకు అద్భుతమైన సాంగ్స్ అందించినా.. తెలుగులో అతని కెరీర్ ఊపందుకోలేదు. ఈ మధ్య 'మాస్టర్' ఆల్బమ్ తో టాలీవుడ్ లో కూడా సత్తా చాటిన అనిరుద్.. ఇప్పుడు తెలుగులో రెండు భారీ సినిమాలకు వర్క్ చేసే అవకాశం దక్కించుకున్నాడని తెలుస్తోంది.

తాజాగా సినీ వర్గాల్లో వినిపిస్తున్న టాక్ ప్రకారం యువ సంగీత దర్శకుడు అనిరుధ్ '#NTR30' చిత్రానికి మ్యూజిక్ డైరెక్టర్ గా ఎంపికయ్యాడని తెలుస్తోంది. ఎన్టీఆర్ - కొరటాల శివ కాంబినేషన్ లో తెరకెక్కనున్న ఈ పాన్ ఇండియా సినిమా త్వరలోనే సెట్స్ పైకి వెళ్లనుంది. ప్రస్తుతం నటీనటుల సాంకేతిక నిపుణులను ఫైనలైజ్ చేసే పనిలో ఉన్నారు. ఈ క్రమంలో మ్యూజిక్ డైరెక్టర్ గా అనిరుద్ రవిచందర్ ను తీకున్నారని.. త్వరలోనే అధికారికంగా ప్రకటించనున్నారని టాక్ నడుస్తోంది. అలానే శంకర్ - రామ్ చరణ్ కాంబోలో రూపొందనున్న '#RC15' కూడా అనిరుధ్ చేతికి వెళ్లినట్లు వార్తలు వినిపిస్తున్నాయి. మధ్యలోనే ఆగిపోయిన 'ఇండియన్ 2' సినిమాకు వర్క్ చేసిన అనిరుధ్ పనితనాన్ని మెచ్చి, డైరెక్టర్ శంకర్ ఇప్పుడు చరణ్ తో చేయబోయే పాన్ ఇండియా సినిమాకి ఛాన్స్ ఇచ్చినట్లు టాక్. ఇదే కనుక నిజమై రెండు సినిమాలు సక్సెస్ అయితే అనిరుధ్ తెలుగులో బిజీ కంపోజర్ అవుతాడని చెప్పవచ్చు.