ప్రభాస్ కోసం 'ఆర్ ఆర్ ఆర్' స్పెషల్ షో!

ప్రభాస్ - రాజమౌళి మధ్య ఉన్న అనుబంధాన్ని గురించి ప్రత్యేకంగా చెప్పుకోవలసిన పనిలేదు. రాజమౌళి పై ప్రభాస్ కి విపరీతమైన అభిమానం .. అంతకు మించిన నమ్మకం ఉన్నాయి. అందువల్లనే 'బాహుబలి' .. 'బాహుబలి 2' సినిమాల సమయంలో ప్రభాస్ మరే సినిమా చేయలేదు. నిజానికి ఈ రెండు సినిమాల సమయంలో ఆయన తక్కువలో తక్కువగా ఓ అరడజను భారీ బడ్జెట్ సినిమాలు చేయవచ్చు. కానీ ఆయన అలాంటి సినిమాలు వదులుకుని రాజమౌళి కూడా ఉన్నాడు. ఆ సినిమాల రిలీజ్ వరకూ ఆయన మరే ప్రాజెక్టు వైపు కన్నెత్తి చూడలేదు.

అలాంటి ప్రభాస్ చేసిన 'రాధేశ్యామ్' .. ' రాజమౌళి చేసిన 'ఆర్ ఆర్ ఆర్' ఒకే నెలలో విడుదలయ్యాయి. 'రాధేశ్యామ్' సినిమా రిలీజ్ సమయంలో ఆ సినిమాకి సంబంధించిన ప్రమోషన్స్ లో భాగంగా ప్రభాస్ ను రాజమౌళి ఇంటర్వ్యూ చేశారు.

ఆ సినిమా ప్రమోషన్స్ లో ఈ ఇంటర్వ్యూ హైలైట్ అయింది. అయితే 'రాధేశ్యామ్' విషయంలో కథ హీరో హీరోయిన్ల మధ్య మాత్రమే తిరిగింది. మిగతా పాత్రలకి సంబంధించిన విషయాలను ఎంతమాత్రం పట్టించుకోవడం జరగలేదు. దాంతో ఆ పాత్రలన్నీ బలహీనపడి తేలిపోయాయి.

భారీ ఓపెనింగ్స్ వచ్చినప్పటికీ, థియేటర్ నుంచి బయటికి వచ్చిన టాక్ ఆ సినిమాను ఎక్కువ రోజులు నిలబెట్టలేకపోయింది. ప్రభాస్ అభిమానులకు నిజంగానే ఇది నిరాశను కలిగించే విషయం. ఇక 'ఆర్ ఆర్ ఆర్' సినిమా నిన్ననే థియేటర్లకు వచ్చింది. చరిత్రను టచ్ చేస్తూ .. కాల్పనికతను జోడిస్తూ రాజమౌళి తెరకెక్కించిన ఈ సినిమా, తొలి ఆటతోనే హిట్ టాక్ తెచ్చుకుంది. ఎన్టీఆర్ - చరణ్ పాత్రలను ఆయన మలిచిన తీరుకు ప్రశంసలు దక్కుతున్నాయి.

ఈ సినిమా చూసిన ఇండస్ట్రీలోని చాలామంది ప్రముఖులు, ఈ సినిమా టీమ్ కి అభినందనలు తెలియజేస్తున్నారు. అంతా కూడా ప్రభాస్ అభిప్రాయం కోసం ఎంతో ఆత్రుతగా ఎదురుచూస్తున్నారు. అయితే ఇంతవరకూ ఆయన ఈ సినిమాపై మాట్లాడలేదు. అందుకు కారణం ఆయన ఈ సినిమాను ఇంకా చూడకపోవడమేనని చెబుతున్నారు.

ఈ నేపథ్యంలో రాజమౌళి ఆయనకి సోమవారం రోజున స్పెషల్ వేయిస్తున్నట్టు సమాచారం. ఎన్టీఆర్ - చరణ్ .. రాజమౌళితో కలిసి ప్రభాస్ ఈ సినిమా చూడనున్నాడని అంటున్నారు.