ప‌వన్ కళ్యాణ్ స్ఫూర్తితో అయోధ్య నిర్మాణానికి రూ.54.51లక్షల విరాళం

అయోధ్య‌లో రామ మందిర నిర్మాణం నేప‌థ్యంలో దేశ‌వ్యాప్తంగా సెల‌బ్రిటీలు విరాళాలు ప్ర‌క‌టిస్తున్న సంగ‌తి తెలిసిందే. జ‌న‌సేనాని.. ప‌వ‌ర్ స్టార్ పవన్ కళ్యాణ్ ఇప్పటికే రూ.30 లక్షలు విరాళాన్ని తిరుపతిలో చెక్కు రూపంలో అయోధ్య నిర్మాణానికి అందించారు.

ప‌వ‌న్ స్ఫూర్తితో ఆయ‌న‌తో సినిమాలు నిర్మిస్తున్న అయిదుగురు నిర్మాతలు అయోధ్య రామ మందిరం నిర్మాణానికి భూరి విరాళం ప్ర‌క‌టించారు. ప‌వ‌న్ స్నేహితుడు ఎ.ఎం.రత్నం (మెగా సూర్య ప్రొడక్షన్స్).. హారిక అండ్ హాసిని క్రియేష‌న్స్ అధినేత‌ ఎస్. రాధాకృష్ణ (చినబాబు),... దిల్ రాజు (శ్రీ వెంకటేశ్వర క్రియేషన్స్),.. నవీన్ ఎర్నేని (మైత్రి మూవీ మేకర్స్), .. బండ్ల గణేష్ (పరమేశ్వర ఆర్ట్ ప్రొడక్షన్స్) కలసి రూ.54.51 లక్షల విరాళాన్ని అయోధ్య రామ మందిరం కోసం ఇచ్చారు.

ప‌వ‌న్ స్ఫూర్తితోనే ఈ విరాళం అని వారు ప్ర‌క‌టించారు. హైదరాబాద్ లో పవన్ కళ్యాణ్ చేతుల మీదుగా నిర్మాతలు- ఆర్.ఎస్.ఎస్. తెలంగాణ ప్రాంత ప్రచారక్ శ్రీ దేవేందర్ జీ గారికి చెక్కులు అందించారు. ఈ కార్యక్రమంలో గోల్కొండ బాఘ్ సంఘ్ చాలక్ డా. వేదప్రకాష్.. నిర్మాత శ్రీ ఎ.దయాకర్ రావు పాల్గొన్నారు. ప‌వన్ ఇంత‌కుముందు ప్ర‌కృతి వైప‌రీత్యాల వేళ భారీగా విరాళాలు ప్ర‌క‌టించారు. ఆప‌ద‌లో ఉన్న అభిమానుల వైద్యం కోసం సాయ‌మందించిన సంగ‌తి తెలిసిందే.