నిరూపించుకుంటానంటున్న నాని హీరోయిన్

విదేశాల్లో పుట్టి పెరిగిన మరో భారతీయ అందం తెలుగు ప్రేక్షకులను తన అందచందాలతో కట్టిపడేయాలని చూస్తోంది. లండన్ లో పుట్టి పెరిగిన రుక్సార్ మిర్ ఈ ఏడాది మొదట్లో వచ్చిన ఆకతాయి సినిమాతో టాలీవుడ్ కు పరిచయమైంది. ఆశిష్ రాజ్ హీరోగా నటించిన ఈ సినిమా కొద్దిరోజుల్లోనే బాక్సాఫీస్ నుంచి తిరిగి వెళ్లిపోయింది. ఈ మూవీ ఫ్లాపయినా రుక్సార్ మిర్ కు మాత్రం మరో అవకాశాన్ని తెచ్చి పెట్టింది.

వెంకటాద్రి ఎక్స్ ప్రెస్ - ఎక్స్ ప్రెస్ రాజా సినిమాలతో కామెడీ బేస్ డ్ ఎంటర్ టెయినర్లు బాగా తీస్తాడని పేరు తెచ్చుకున్న దర్శకుడు మేర్లపాక గాంధీ నేచురల్ స్టార్ నానితో తర్వాత తీయబోయే సినిమాలో రుక్సార్ హీరోయిన్ గా ఎంపికైంది. ఈ సినిమాతో తానేమిటో నిరూపించుకుంటానని రుక్సార్ నమ్మకంగా చెబుతోంది. ఈ సినిమా సబ్జెక్టు లో హీరోయిన్ నటనకు మంచి స్కోప్ ఉందని... ఈ అవకాశాన్ని చక్కగా వినియోగించుకుంటానని ఆనందంగా చెబుతోంది. నానిలాంటి నటుడి పక్కన అవకాశం రావడం చాలా ఆనందంగా ఉందని.. అతడితో పనిచేయడం అమేజింగ్ అంటూ ఉబ్బితబ్బిబ్బవుతోంది.

మేర్లపాక గాంధీ మొదటి సినిమా వెంకటాద్రి ఎక్స్ ప్రెస్ లో హీరోయిన్ గా నటించిన రకుల్ ప్రీత్ సింగ్ కు చాలా మంచి పేరొచ్చింది. దీని తర్వాత ఛాన్సులు వరస కట్టి ఇప్పుడు తెలుగులో టాప్ హీరోయిన్ గా పేరు తెచ్చుకుంది. రుక్సార్ అందగత్తే కాబట్టి కాస్తంత యాక్టింగ్ పరంగానూ ప్రూవ్ చేసుకుంటే టాలీవుడ్ లో మరిన్ని అవకాశాలు ఆమెను వరించడం ఖాయం.