రూల్స్ పెడతాడు కానీ ఫాలో అవ్వ‌డు...!

సినిమా తీయడానికి దర్శక నిర్మాతలు నటీనటులు టెక్నీషియన్స్ ఎంత కష్టపడినా చివరికి అది జనాల్లోకి తీసుకెళ్లడానికి ప్రసార మాధ్యమాలు, వెబ్ సైట్స్ మరియు సోషల్ మీడియా మేజర్ రోల్ ప్లే చేస్తాయనేది అందరికి తెలిసిన విషయమే. అయితే ఈ మధ్య టాలీవుడ్ లో కొందరు ప్రొడ్యూసర్స్ గ్రూపుగా ఏర్పడి ఫిలిం మీడియాపై ఆంక్షలు పెట్టాలని నిర్ణయించుకున్నారని టాక్ నడిసింది. ప్రముఖ నిర్మాత ఆధ్వర్యంలో జరిగిన గ్రూప్ మీటింగ్ లో కొన్ని ప్రసార మాధ్యమాలకు వెబ్ సైట్స్ కు యాడ్స్ ఇవ్వకూడదనే విధంగా తీర్మానం చేశారని సమాచారం. లాక్ డౌన్ అయిపోయి సాధారణ పరిస్థితులు తలెత్తిన తర్వాత ఆచరణలో పెడదామని అనుకున్నారు. అయితే ఇప్పుడు ఆంక్షలకు రూప‌క‌ల్ప‌న చేసిన పెద్ద మనిషి ఇప్పుడు రూల్స్ బ్రేక్ చేసేశాడని ఫిలిం సర్కిల్స్ లో కామెంట్స్ వస్తున్నాయి.

కాగా, మొదటి నుంచి కూడా సదరు నిర్మాత ఫిల్మ్ మీడియా పై వివ‌క్ష చూపిస్తారనే కామెంట్స్ వినిపించేవి. ఈ క్రమంలో స్టార్ హీరోల్ని కూడదీసుకుని ఎల్ ఎల్ పీలో ఉన్న నిర్మాత‌లతో మీటింగ్ పెట్టి కొన్ని రూల్స్ పాస్ చేశాడ‌ని టాక్ ఉంది. అయితే ఇప్పుడు అదే నిర్మాత రూల్స్ బ్రేక్ చేసి ఎవరినైతే బ్యాన్ చేయాలని తీర్మానించాడో వారికే తన సినిమాకి సంబంధించిన యాడ్స్ ని ఇచ్చినట్లు తెలుస్తోంది. దీంతో ప్రొడ్యూస‌ర్స్ ఎల్ ఎల్ పీ మీటింగ్ లో పాల్గొన్న మిగతా వారు అతను రూల్స్ పెడతాడు కానీ ఆ రూల్స్ ఫాలో అవ్వ‌డని.. దీనికోసం మీటింగులు పెట్టడం ఎందుకో అని కామెంట్స్ చేస్తున్నారని ఇండస్ట్రీ వర్గాల్లో టాక్ నడుస్తోంది.