ప్రభాస్ 'ప్రాజెక్ట్ K' లో మార్పులు చేస్తున్నారా..?

పాన్ ఇండియా స్టార్ ప్రభాస్ - బాలీవుడ్ బ్యూటీ దీపికా పదుకొనే హీరోహీరోయిన్లుగా ఓ భారీ ప్రాజెక్ట్ తెరకెక్కుతున్న సంగతి తెలిసిందే. ఇందులో బిగ్ బి అమితాబ్ బచ్చన్ కీలక పాత్ర పోషిస్తున్నారు. ''ప్రాజెక్ట్ K'' అనే వర్కింగ్ టైటిల్ తో నాగ్ అశ్విన్ దర్శకత్వంలో ఈ చిత్రాన్ని సెట్స్ మీదకు తీసుకెళ్లారు. ఇప్పటికే రెండు కీలకమైన షెడ్యూల్స్ షూటింగ్ పూర్తి చేసుకున్న ఈ మూవీ తదుపరి షెడ్యూల్ కు రెడీ అవుతోంది. అయితే పాన్ వరల్డ్ స్థాయిలో రూపొందనున్న ఈ సినిమాలో కొన్ని చేంజెస్ చేస్తున్నారని.. దీనికి కారణం 'బ్రహ్మాస్త్ర' మూవీ అనే రూమర్స్ ఇప్పుడు ఫిలిం సర్కిల్స్ లో చక్కర్లు కొడుతున్నాయి.

ప్రస్తుతం అత్యంత ప్ర‌తిష్టాత్మ‌కంగా తెరకెక్కుతున్న బాలీవుడ్ చిత్రాల్లో ''బ్ర‌హ్మాస్త్ర'' ఒకటి. అయాన్ ముఖర్జీ దర్శకత్వం వహిస్తున్న ఈ సోషియో ఫాంటసీ అడ్వెంచర్ మూవీలో రణబీర్ కపూర్ - అలియా భట్ - అమితాబ్ బ‌చ్చ‌న్ - మౌనీ రాయ్‌ ప్ర‌ధాన పాత్ర‌ల్లో నటించారు. కింగ్ అక్కినేని నాగార్జున చాలా గ్యాప్ త‌ర్వాత ఈ సినిమాతో హిందీలోకి ఎంట్రీ ఇస్తున్నారు. 'బ్ర‌హ్మాస్త్ర' చిత్రాన్ని మూడు భాగాలుగా ప్లాన్ చేయగా.. ''బ్రహ్మాస్త్ర ఫస్ట్ పార్ట్: శివ'' పేరుతో మొదటి భాగాన్ని విడుదల చేయనున్నారు. తెలుగులో రాజమౌళి పేరు మీదుగా ప్రేక్షకుల ముందుకు రానుంది.

అయితే ఇక్కడ విషయం ఏమిటంటే.. 'బ్రహ్మాస్త్ర' కథ - 'ప్రాజెక్ట్ K' స్టోరీ లైన్ రెండూ దగ్గరగా ఉంటుందట. విశ్వంలోనే అత్యంత శక్తివంతమైన ఆయుధం గురించి బ్రహ్మాస్త్ర సినిమా ఉంటుందని ఇటీవల వచ్చిన మోషన్ పోస్టర్ ని బట్టి అర్థం అవుతుంది. మరోవైపు ప్రభాస్ సినిమా మూలకథ ఇదేనని అంటున్నారు. అక్కడ రణబీర్ కపూర్ సూపర్ నేచురల్ పవర్స్ ఉన్న వ్యక్తిగా కనిపిస్తే.. ఇక్కడ ప్రభాస్ సూపర్ హీరోగా కనిపించనున్నారట. ఈ నేపథ్యంలో డైరెక్టర్ నాగ్ అశ్విన్ కథలో కొన్ని మార్పులు చేయడానికి రెడీ అయ్యారని రూమర్స్ వస్తున్నాయి.

'ప్రాజెక్ట్ K' చిత్రాన్ని సైన్స్ ఫిక్షన్ - సోషియో ఫాంటసీ జోనర్ లో తెరకెక్కుతున్న సూపర్ హీరో మూవీ అని తెలుస్తోంది. భారీ బడ్జెట్ తో హై టెక్నికల్ వాల్యూస్ తో విజువల్ వండర్ గా తెరకెక్కించనున్నారు. వైజయంతీ మూవీస్ బ్యానర్ పై అశ్వినీ దత్ ప్రతిష్టాత్మకంగా నిర్మిస్తున్నారు. మిక్కీ జె. మేయర్ సంగీతం సమకూరుస్తుండగా.. డానీ శాంచెజ్-లోపెజ్ సినిమాటోగ్రఫీ అందిస్తున్నారు. పాన్ వరల్డ్ స్థాయిలో 2023లో ఈ చిత్రాన్ని ప్రేక్షకుల ముందుకు తీసుకురానున్నారు.