క్రిష్ - పవన్ ప్రాజెక్టుపై వస్తున్న వార్తల్లో నిజమెంత...?

పవర్ స్టార్ పవన్ కళ్యాణ్ సినిమాల్లోకి రీఎంట్రీ ఇచ్చి వరుస సినిమాలు లైన్లో పెడుతున్న సంగతి తెలిసిందే. ప్రస్తుతం ఆయన నటిస్తున్న 'వకీల్ సాబ్' సినిమా ఇప్పటికే చాలా భాగం షూటింగ్ జరుపుకోగా.. ఒక షెడ్యూల్ మాత్రమే మిగిలి ఉందని సమాచారం. ఈ సినిమా తరవాత వైవిధ్యమైన చిత్రాలను తెరకెక్కించే క్రిష్ జాగర్లమూడి దర్శకత్వంలో పవన్ ఒక సినిమా చేయబోతున్నారు. 'వకీల్ సాబ్' స్టార్ట్ అయిన వెంటనే క్రిష్ సినిమా ఓకే చేసేశాడు పవన్. పీరియాడిక్ డ్రామాగా తెరకెక్కుతున్న ఈ సినిమాని ప్రముఖ నిర్మాత ఏఎం రత్నం భారీ బడ్జెట్ తో నిర్మించనున్నారు. వీటితో పాటు పవర్ స్టార్ తన కెరీర్లో 28వ చిత్రాన్ని డైరెక్టర్ హరీష్ శంకర్ తో చేయనున్నాడు. మైత్రీ మూవీ మేకర్స్ నిర్మించనున్న ఈ సినిమాకి దేవిశ్రీ సంగీతం అందించనున్నాడు. క్రిష్ సినిమా కంప్లీట్ అయిన వెంటనే హరీష్ తో సినిమా స్టార్ట్ చేస్తారని అనుకున్నారు. అయితే ఇండస్ట్రీలో ప్రస్తుతం నెలకొనియున్న పరిస్థితుల వలన భారీ తారాగణంతో షూటింగ్స్ చేసే అవకాశాలు లేకపోవడం.. స్టోరీ విషయంలో పవన్ కళ్యాణ్ కొంత నిరాశలో ఉండి క్రిష్ సినిమాని పక్కన పెట్టి హరీష్ శంకర్ తో సినిమా స్టార్ట్ చేస్తారని గత కొన్ని రోజులుగా వార్తలు వస్తున్నాయి.

అయితే తాజా సమాచారం ప్రకారం ఈ సినిమాపై వస్తున్న వార్తల్లో నిజం లేదట. 'వకీల్ సాబ్' సినిమా షూటింగ్ పూర్తైన వెంటనే క్రిష్ సినిమా చిత్రీకరణ ప్రారంభం కాబోతోందట. ఇప్పటికే ఒక షెడ్యూల్ షూటింగ్ జరుపుకున్న ఈ సినిమా స్టోరీ నచ్చకపోతే పవర్ స్టార్ సైన్ చేసేవాడు కాదని.. చిత్రీకరణలో పాల్గొనే వారు కాదని చిత్ర యూనిట్ లోని ఒక సభ్యుడు వెల్లడించారు. అంతేకాకుండా 'వకీల్ సాబ్' షూటింగ్ పూర్తయిన వెంటనే ఈ సినిమా షూటింగ్ స్టార్ట్ కాబోతోందని.. ఇప్పటికే దానికి సంభందించిన ప్లానింగ్ కూడా రెడీ చేసుకున్నామని చెప్పుకొచ్చారట. కాగా మొఘలాయుల కాలంలో మంచి కోసం పోరాడే ఓ హిస్టారికల్ పాత్ర పవన్ కళ్యాణ్ పోషిస్తున్నాడని సమాచారం. ఈ చిత్రానికి ‘విరూపాక్ష’ అనే పేరు పరిశీలనలో ఉంది. ఎమ్ ఎమ్ కీరవాణి ఈ చిత్రానికి సంగీతం అందించనున్నారు.