ఒక్క మ‌హేష్‌.. ఎన్ని ఊహాగానాలో?

సూప‌ర్ స్టార్ మ‌హేష్ బాబు టాలీవుడ్ లో మోస్ట్ వాంటెడ్ హీరోల్లో ఒక‌డు. ప్ర‌తి ద‌ర్శ‌కుడూ అత‌డితో ఒక్క సినిమా అయినా చేయాలి అని ఆశిస్తార‌న‌డంలో సందేహం లేదు. వేరే ఇండ‌స్ట్రీల ద‌ర్శ‌కులు సైతం మ‌హేష్ కోసం ప్ర‌య‌త్నించ‌డం చూశాం. అందులో మురుగ‌దాస్ కూడా ఒక‌డు. ఇక తెలుగు ద‌ర్శ‌కుల సంగ‌తి చెప్పాల్సిన ప‌ని లేదు. మ‌హేష్ లాంటి అంద‌మైన - ప్రతిభావంతుడైన - తిరుగులేని ఫ్యాన్ ఫాలోయింగ్ - మార్కెట్ ఉన్న హీరోతో ప‌ని చేయాల‌ని ఏ ద‌ర్శ‌కుడు కోరుకోడు? ఇలా ద‌ర్శ‌కులు చాలామంది త‌మ ప్ర‌య‌త్నాల్లో తాము ఉంటారు. అభిమానుల‌కు కూడా మ‌హేష్ కొత్త సినిమాల‌పై ఆస‌క్తి ఉంటుంది. ఈ నేప‌థ్యంలో సోష‌ల్ మీడియాలో రోజుకో పుకారు బ‌య‌ల్దేరుతోంది. ఫ‌లానా ద‌ర్శ‌కుడితో మ‌హేష్ సినిమా అంటూ అదే ప‌నిగా ప్ర‌చారాలు జ‌రిగిపోతున్నాయి.

గ‌త కొన్ని నెల‌ల్లో మ‌హేష్ కొత్త సినిమా గురించి ఎన్ని ఊహాగానాలు వ‌చ్చాయో లెక్క లేదు. మ‌ళ్లీ త్రివిక్ర‌మ్‌ తో మ‌హేష్ జ‌ట్టు క‌ట్ట‌బోతున్నాడ‌ని అన్నారు. అలాగే అర్జున్ రెడ్డి ఫేమ్ సందీప్ రెడ్డి వంగ‌తో సినిమా ఖ‌రారైంద‌న్నారు. సుకుమార్‌ తో ఒక సినిమా క్యాన్సిల్ అయినా.. మ‌రో సినిమా చేయ‌డానికి మ‌హేష్ రెడీ అవుతున్న‌ట్లు కూడా వార్త‌లు హ‌ల్ చ‌ల్ చేశాయి. ఇప్పుడేమో కేజీఎఫ్ ద‌ర్శ‌కుడు ప్ర‌శాంత్ నీల్ పేరు వినిపిస్తోంది. అది చాల‌ద‌న్న‌ట్లు అనిల్ రావిపూడి ప‌నితీరుకు ఫిదా అయి అత‌డితోనే ఇంకో సినిమా చేయ‌డానికి రెడీ అయ్యాడ‌ని కూడా అంటున్నారు. ఇంకా ఆర్ ఆర్ ఆర్ త‌ర్వాత రాజ‌మౌళి సినిమా మ‌హేష్‌ తోనే అంటున్నారు. బోయ‌పాటి పేరు సైతం వినిపిస్తోంది. మొత్తానికి మ‌హేష్ ఫ్యూచ‌ర్ ప్రాజెక్టుల గురించి ఇన్ని రూమ‌ర్లు వినిపించ‌డం విశేష‌మే.