మాస్ మ‌హారాజాతో `Rx100` బ్యూటీ

`క్రాక్‌`తో ట్రాక్ లోకి వ‌చ్చేశారు మాస్ మ‌హారాజా ర‌వితేజ‌. క‌ష్ట‌కాలంలో `క్రాక్` సినిమా త‌న‌కు బ్లాక్ బ‌స్ట‌ర్ హిట్ ని అందించ‌డంతో రెట్టించిన ఉత్సాహంతో వున్న ర‌వితేజ వ‌రుస‌గా సినిమాల‌ని లైన్ లో పెట్టేశారు. ఆయ‌న సినిమా లైన‌ప్ చూస్తే ఎవ‌రికైనా మ‌తిపోవాల్సిందే. మొత్తం ఐదు చిత్రాల్లో న‌టిస్తూ య‌మ బిజీగా వున్నారు ర‌వితేజ‌. ఇందులో త్రినాథ‌రావు న‌క్కిన తెర‌కెక్కిస్తున్న చిత్రం కూడా వుంది. ఈ చిత్రాన్ని `ధ‌మాకా` పేరుతో రూపొందిస్తున్నారు.

పీపుల్స్ మీడియా ఫ్యాక్ట‌రీ, అభిషేక్ అగ‌ర్వాల్ ఆర్ట్స్ నిర్మాత టి.జి. విశ్వ‌ప్ర‌సాద్ ఈ చిత్రాన్ని మాసీవ్ యాక్ష‌న్ కామెడీ ఎంట‌ర్ టైన‌ర్ గా నిర్మిస్తున్నారు. ప్ర‌స్తుతం ఈ మూవీ చిత్రీక‌ర‌ణ ద‌శ‌లో వుంది. ఈ చిత్రంలోని ఓ ప్ర‌త్యేక గీతంలో రంగ‌మ్మ‌త్త అన‌సూయ న‌టించ‌నుందంటూ గత కొన్ని రోజులుగా వార్త‌లు షికారు చేస్తున్నాయి. అయితే ఆ వార్త‌ల్లో ఎలాంటి నిజం లేద‌ని తాజాగా చిత్ర బృందం క్లారిటీ ఇచ్చేసింది. ఈ సినిమాలోని ప్ర‌త్యేక గీతంలో అన‌సూయ కాకుండా `Rx100` బ్యూటీ పాయ‌ల్ రాజ్ పుత్ క‌నిపించ‌నుంద‌ని తాజా టాక్‌.

ఈ టాక్ ని నిజం చేస్తూ ర‌వితేజ‌తో పాయ‌ల్ సెల్ఫీ తీసుకున్న ఓ ఫొటో నెట్టంట ప్ర‌స్తుతం వైర‌ల్ గా మారింది. అయితే తాజా వార్త‌పై మేక‌ర్స్ మాత్రం ఎలాంటి ప్ర‌క‌ట‌న చేయ‌లేదు. ఇదిలా వుంటే ఫ్యామిలీ ఎంట‌ర్‌టైన‌ర్ ల‌కు త‌న‌దైన కామెడీ అంశాల్ని జోడించి తెర‌కెక్కించ‌డంతో ద‌ర్శ‌కుడు త్రినాథ‌రావు న‌క్కిన‌ది ప్ర‌త్యేక శైలి. అదే శైలిలో ర‌వితేజ పాత్ర‌ని స‌రికొత్త‌గా మ‌లిచి ఈ చిత్రంలో చూపించ‌బోతున్నార‌ని, ఇందులో ర‌వితేజ చేసే కామెడీ మామూలుగా వుండ‌ద‌ని చెబుతున్నారు.

ముందు విక్ట‌రీ వెంక‌టేష్ వ‌ద్ద‌కు వెళ్లి ఆల‌స్య‌మ‌వుతూ వ‌చ్చిన ఈ స్టోరీ ఫైన‌ల్ గా మాస్ రాజా ర‌వితేజ త‌లుపు త‌ట్ట‌డం.. క‌థ‌, క్యారెక్ట‌ర్ న‌చ్చి ర‌వితేజ గ్రీన్ సిగ్న‌ల్ ఇవ్వ‌డంతో ఈ సినిమా ఫైన‌ల్ గా ప‌ట్టాలెక్కేసింది. ప్ర‌స్తుతం చిత్రీక‌ర‌ణ ద‌శ‌లో వున్న ఈ చిత్రంపై ఇప్ప‌టికే భారీ అంచ‌నాలు నెల‌కొన్నాయి.