ఫస్ట్ లుక్: గుణ369 గా ఆరెక్స్ హీరో

మొదటి సినిమా 'RX100' తో సూపర్ హిట్ సాధించి అందరి దృష్టిలో పడిన హీరో కార్తికేయ. డీసెంట్ యాక్టింగ్ తో పాటు బాలీవుడ్ హీరోల లాగా ఫిజిక్ కూడా మెయింటెయిన్ చేస్తుండడంతో కార్తికేయపై యూత్ లో కూడా ఆసక్తి నెలకొంది. మొదటి సినిమా హిట్ కావడం తో కార్తికేయకు ఆఫర్లు చాలానే వచ్చాయి. అందులో కొన్ని ఇంట్రెస్టింగ్ ప్రాజెక్టులను లైన్లో పెట్టాడు.

డిసెంబర్లో నూతన దర్శకుడు అర్జున్ జంధ్యాల దర్శకత్వంలో ఒక సినిమా స్టార్ట్ అయింది. బోయపాటి శ్రీను శిష్యుడైన అర్జున్ దాదాపు గా 12 ఏళ్ళు బోయపాటి వద్ద దర్శకత్వ శాఖలో పని చేశాడు. తాజాగా కార్తికేయ - అర్జున్ జంధ్యాల సినిమాకు సంబంధించిన ఫస్ట్ లుక్ రిలేజ్ చేశారు. ఈ సినిమాకు 'గుణ369' అనే ఇంట్రెస్టింగ్ టైటిల్ లాక్ చేశారు. ఫస్ట్ లుక్ పోస్టర్ లో కార్తికేయ షర్ట్ లేకుండా సల్మాన్ ఖాన్ అవతారంలో కనిపిస్తున్నాడు. వెనక్కు తిరిగి తల వెనక చేతులు పెట్టుకోవడంతో మొహం కనపడడం లేదు. కానీ ఫస్ట్ లుక్ మాత్రం ఇంటెన్స్ గా ఉంది.

చైతన్ భరద్వాజ్ ఈ చిత్రానికి సంగీత దర్శకుడు. రామ్ సినిమాటోగ్రఫీ అందిస్తున్నారు. ఈ సినిమాను తిరుమల్ రెడ్డి.. అనిల్ కడియాల కలిసి స్ప్రింట్ ఫిల్మ్స్.. జ్ఞాపిక ఎంటర్టైన్మెంట్స్ బ్యానర్లపై నిర్మిస్తున్నారు. ఈ సినిమా కాకుండా కార్తికేయ మరో రెండు సినిమాలలో నటిస్తున్నాడు. TM కృష్ణ దర్శకత్వంలో తెరకెక్కే'హిప్పి' జూన్ 7 న రిలీజ్ కు సిద్ధం అవుతోంది. ఈ సినిమా తో పాటు విక్రమ్ కుమార్- నాని కాంబినేషన్ లో తెరకెక్కుతున్న 'గ్యాంగ్ లీడర్' సినిమాలో కార్తికేయ విలన్ పాత్రలో నటిస్తున్నాడు.