సాహసం శ్వాసగా.. కలయా నిజమా

తమిళ స్టార్ డైరెక్టర్ గౌతమ్ మీనన్.. అక్కినేని కుర్రాడు నాగచైతన్య కాంబినేషన్లో తెరకెక్కిన ‘ఏమాయ చేసావె’ తెలుగు ప్రేక్షకులపై ఎలాంటి ముద్ర వేసిందో కొత్తగా చెప్పాల్సిన పని లేదు. అదే కాంబినేషన్లో మళ్లీ ఇంకో సినిమా అనగానే ప్రేక్షకుల్లో మంచి ఆసక్తి నెలకొంది. గత ఏడాది ఆ సినిమాకు ‘సాహసం శ్వాసగా సాగిపో’ అనే చక్కటి టైటిల్ పెట్టడమే కాక.. ఆకర్షణీయమైన ప్రోమోలు వదిలి ఆసక్తిని మరింత పెంచాడు గౌతమ్ మీనన్. దీని టీజర్.. ఆడియో కూడా సినిమా మీద మరింత పాజిటివ్ ఫీల్ తీసుకొచ్చాయి. ఐతే ఎప్పుడెప్పుడు విడుదలవుతుందా అని జనాలు ఎదురు చూస్తుంటే.. ఏడాదిగా దాగుడు మూతలు ఆడుతూ వస్తోంది చిత్ర బృందం.

గత మూణ్నాలుగు నెలల్లో ‘సాహసం శ్వాసగా సాగిపో’ రిలీజ్ డేట్ అంటూ నాలుగైదు తేదీలు ప్రకటించారు. కానీ ఆ తేదీల్లో సినిమా రాలేదు. ఐతే ఇప్పుడు తాజాగా నవంబరు 11న రిలీజ్ అంటూ ప్రకటన వచ్చింది. ముందు ఈ డేట్ వినిపించినపుడు జనాలు నమ్మలేదు. ఇలా ఎన్ని డేట్లు వినలేదు అంటూ లైట్ తీసుకున్నారు. ఐతే హీరో.. డైరెక్టర్ సహా ఈ చిత్రాన్ని తెలుగు రాష్ట్రాల్లో రిలీజ్ చేస్తున్న దిల్ రాజు కూడా వచ్చి ప్రెస్ మీట్లో రిలీజ్ డేట్ గురించి ప్రకటన చేయడం.. మరోవైపు తమిళ వెర్షన్ కూడా విడుదలకు రెడీ అయిపోవడంతో జనాలకు ఇప్పటికి నమ్మకం వచ్చింది. మామూలుగా మంచి క్రేజున్న సినిమా రిలీజవుతోందంటే.. రెండు వారాల ముందు నుంచి జనాల్లో డిస్కషన్లు మొదలైపోతాయి. ఈ సినిమా ఎలా ఉంటుందో.. దర్శకుడు ఎలా తీశాడో.. హీరో ఎలా చేశాడో.. కథ ఏంటో అంటూ చర్చలు నడుస్తుంటాయి. కానీ ‘సాహసం శ్వాసగా..’ విషయంలో అలా జరగట్లేదు. గతంలో చాలాసార్లు ఇలా చర్చించుకోవడం.. రిలీజ్ డేట్ మారిపోవడం జరిగింది. దీంతో ఇంకా ఈ సినిమా రిలీజ్ ఖాయం అనే విషయాన్ని జీర్ణించుకునే పనిలోనే ఉన్నారు జనాలు. రిలీజ్ వీక్ లోకి ఎంటరయ్యాక కానీ జనాలు ఆ డిస్కషన్లలోకి వెళ్లరేమో!

Like Us on Facebook : https://www.facebook.com/Tupakidotcom/