సాహసం శ్వాసగా.. అడ్డంకులన్నీ తొలగినట్లే

రిలీజ్ డేట్ కన్ఫమ్ చేస్తూ ఈ మధ్యే ప్రెస్ మీట కూడా పెట్టారు కదా.. మళ్లీ అడ్డంకులేంటి అంటారా? ‘సాహసం శ్వాసగా సాగిపో’ సినిమాకు మొదట్నుంచి ఉన్న అడ్డంకి తమిళ వెర్షనే. ఈ సినిమా రిలీజ్ అన్నిసార్లు వాయిదా పడిందంటే అందుకు తమిళ వెర్షన్ పూర్తి కాకపోవడమే కారణం. ఈ మధ్యే దాని షూటింగ్ మొత్తం పూర్తి చేసి.. పోస్ట్ ప్రొడక్షన్ అనంతరం ఫస్ట్ కాపీ రెడీ చేశాక కానీ.. రిలీజ్ విషయంలో ఒక క్లారిటీ రాలేదు. ఐతే తెలుగులో రిలీజ్ డేట్ ఇచ్చేసి.. ప్రమోషన్ కూడా మొదలుపెట్టేసినా.. తమిళ వెర్షన్ విడుదల విషయంలో కొన్ని రోజులుగా కొంత సందిగ్ధత నడిచింది. అక్కడ ప్రమోషన్లు మొదలవలేదు. రిలీజ్ డేట్ పోస్టర్లు వేయలేదు.

దీంతో సినిమా మళ్లీ ఏమైనా వాయిదా పడుతుందేమో అన్న సందేహాలు నెలకొన్నాయి. ఐతే తమిళంలో సెన్సార్ కాకపోవడమే రిలీజ్ డేట్ ఇవ్వకపోవడానికి కారణం. సెన్సార్ పూర్తి కాకుండా రిలీజ్ డేట్ ప్రకటించడం నిబంధనలకు విరుద్ధం. ఈ నిబంధనను తమిళనాట చాలా స్ట్రిక్టుగా ఫాలో అవుతున్నారు. దీంతో పాటు సెన్సార్ విషయంలో ఏమైనా ఇబ్బందులు తలెత్తుతాయేమో అని కూడా ఎదురు చూశారు. మరోవైపు గత కొంత కాలంగా శింబు సినిమాలకు విడుదలకు ముందు ఏదో ఒక వివాదం తలెత్తడం.. రిలీజ్ ఆగిపోవడం మామూలైపోయింది. ఈ నేపథ్యంలోనే ‘సాహసం..’ తమిళ వెర్షన్ కు ఏమైనా బ్రేకులు పడతాయేమో అని సందేహించారు. ఐతే అదృష్టవశాత్తూ అలాంటిదేమీ జరగలేదు. సెన్సార్ కూడా సాఫీగా పూర్తయింది. ఎట్టకేలకు దర్శక నిర్మాత గౌతమ్ మీనన్ ఈ సినిమా రిలీజ్ డేట్ కన్ఫమ్ చేస్తూ.. ట్విట్టర్లో ప్రకటన కూడా చేశాడు. రిలీజ్ డేట్ పోస్టర్ కూడా వదిలాడు. రెండు వెర్షన్లూ ఒకేసారి విడుదల చేయాల్సి ఉంది కాబట్టి కాబట్టి.. దానికి క్లియరెన్స్ వచ్చిందంటే.. ‘సాహసం..’ విడుదలకూ అడ్డంకులేమీ లేనట్లే.

Like Us on Facebook : https://www.facebook.com/Tupakidotcom/