ఇది అసలు సిసలైన ‘సాహసం..’

ఎప్పుడో ఏడాది కిందట విడుదల కావాల్సిన సినిమా ‘సాహసం శ్వాసగా సాగిపో’. కానీ అనుకోని ఇబ్బందులతో వాయిదాల మీద వాయిదాలు పడి ఎట్టకేలకు విడుదలకు సిద్ధమైంది. నిజానికి తెలుగు వెర్షన్ విషయంలో ఏ రకమైన ఇబ్బందీ లేదు. అంతా సవ్యంగా సాగిపోయింది. కానీ తమిళ వెర్షన్ విషయంలో తలెత్తిన తలనొప్పులు.. ‘సాహసం..’కూ చుట్టుకున్నాయి. పలుమార్లు రిలీజ్ డేట్ మార్చుకుని ఎట్టకేలకు విడుదలకు ఫైనల్‌ గా ముహూర్తం చూస్తే.. ఇప్పుడు అనుకోని అవాంతరం ఎదురైంది. విడుదలకు సరిగ్గా మూడు రోజుల ముందు 500.. 1000 నోట్లను రద్దు చేయడంతో ‘సాహసం..’కు ప్రతికూలంగా మారింది.

నిన్నట్నుంచి థియేటర్ల దగ్గర పరిస్థితి ఏమంత బాగా లేదు. జనాలు సినిమా చూసే మూడ్లో లేరు. పాత 500.. 1000 నోట్లు చెల్లని నేపథ్యంలో ఉన్న 100 నోట్లను సినిమాకు ఖర్చు పెట్టాలనుకోవట్లేదు. ఈ నేపథ్యంలో సినిమాను వాయిదా వేస్తే బెటర్ అన్న అభిప్రాయాలు కూడా వినిపిస్తున్నాయి. కానీ ఇప్పటికే పలుమార్లు వాయిదా పడ్డ నేపథ్యంలో చివరి నిమిషంలో మళ్లీ పోస్ట్ పోన్ అంటే బాగోదని.. విడుదల దిశగా సాహసోపేత నిర్ణయమే తీసుకుంది చిత్ర బృందం. ఐతే ఈ రోజు నుంచి కొత్త 500.. 1000 నోట్లు వచ్చేస్తున్నాయి. పాత నోట్ల మార్పిడి కూడా జరుగుతోంది. రేపటికి పరిస్థితి కొంచెం సానుకూలంగా మారొచ్చు. మరి థియేటర్ల దగ్గర పరిస్థితి ఎలా ఉంటుందో చూడాలి. ప్రస్తుత అయోమయ పరిస్థితుల్లో ఆక్యుపెన్సీ మీద ఎంతో కొంత ప్రభావం పడటం ఖాయం. మరి చైతూ అండ్ కో చేస్తున్న సాహసానికి ఎలాంటి ఫలితం దక్కుతుందో చూద్దాం.

Like Us on Facebook : https://www.facebook.com/Tupakidotcom/