చైతూ ఢీ అంటే ఢీ అంటున్నాడు

మనం - ఒక లైలా కోసం లాంటి సినిమాలతో ఊపు మీదున్న నాగచైతన్యకి ‘దోచేయ్’ సినిమా బ్రేకులేసింది. ఐతే ఆ సినిమా ప్రభావం నుంచి వెంటనే బయపడి గౌతమ్ మీనన్ తో ‘సాహసం శ్వాసగా సాగిపో’ సినిమా మొదులపెట్టేశాడు చైతూ. నాలుగు నెలలుగా నిర్విరామంగా షూటింగులో పాల్గొంటున్నాడు. ఈ మధ్య రిలీజైన ఫస్ట్ లుక్ పోస్టర్ - టీజర్ లకు అదిరిపోయే రెస్పాన్స్ వచ్చింది. ‘ఏమాయ చేసావె’ తరహాలోనే గౌతమ్-చైతూ ఓ ఫ్రెష్ సినిమాతో ప్రేక్షకుల ముందుకు రాబోతున్నారన్న ఫీలింగ్ కలిగించింది టీజర్. ఈ సినిమా షూటింగ్ దాదాపుగా పూర్తి కావచ్చింది. దీపావళికే తెలుగు - తమిళ భాషల్లో ఈ చిత్రాన్ని రిలీజ్ చేయడానికి సన్నాహాలు చేస్తున్నాడు గౌతమ్ మీనన్.

దీపావళికి తెలుగులో - తమిళంలో పెద్ద సినిమాలు లైన్ లో ఉన్నప్పటికీ ‘సాహసం శ్వాసగా సాగిపో’ను కూడా ఆ సీజన్ లోనే విడుదల చేయాలని ఫిక్సయ్యారు. వరుణ్ తేజ్-క్రిష్ ల ‘కంచె’ - కమల్ హాసన్ ‘చీకటి రాజ్యం’ దీపావళికే విడుదల కాబోతున్నాయి. ఐతే తమది ఓ విభిన్నమైన సినిమా కాబట్టి వాటికి పోటీ కాదని భావిస్తున్నారు గౌతమ్ - చైతూ. అక్టోబరులో ఆడియో ఫంక్షన్ కు సన్నాహాలు చేస్తున్నారు. ‘ఏమాయ చేసావె’కు సాహసం శ్వాసగా సాగిపో సీక్వెల్ కాని సీక్వెల్. అందులో హీరో క్యారెక్టర్ తీసుకుని.. జెస్సీ కాకుండా వేరే అమ్మాయి అతడికి ఎదురైతే ఎలా ఉండేదన్న నేపథ్యంలో ప్రయోగాత్మకంగా ఈ చిత్రాన్ని రూపొందిస్తున్నాడు గౌతమ్. మలయాళ కుట్టి మంజిమా మోహన్ తెలుగు, తమిళ భాషల్లో హీరోయిన్ గా నటిస్తోంది. ఎ.ఆర్.రెహమాన్ సంగీత దర్శకుడు.