స్టార్ హీరోతో డైరెక్టర్ సుజీత్.. చర్చలు ఫలించేనా??

'రన్ రాజా రన్' సినిమాతో టాలీవుడ్ ఇండస్ట్రీకి దర్శకుడుగా పరిచయం అయ్యాడు సుజీత్. శర్వానంద్ హీరోగా తెరకెక్కిన ఆ సినిమా బాక్సాఫీస్ దగ్గర మంచి విజయాన్ని సొంతం చేసుకుంది. ఫస్ట్ సినిమా హిట్ తర్వాత భారీ గ్యాప్ తీసుకొని డార్లింగ్ ప్రభాస్ తో పాన్ ఇండియా మూవీ సాహో చేసాడు. సాహోతో దర్శకుడుగా దేశవ్యాప్తంగా గుర్తింపు తెచ్చుకున్నాడు. కానీ ఆ సినిమా పేరు తెచ్చింది కానీ అవకాశాలు తేలేకపోయింది. అందుకే సాహో వచ్చి రెండేళ్లు దగ్గర పడుతున్నా తదుపరి సినిమా పై క్లారిటీ ఇవ్వలేకపోయాడు. ఇక చేసేదేం లేక సుజీత్ మధ్యలో ప్రేమపెళ్లి చేసేసుకున్నాడు. మరి పెళ్లి తర్వాత అయినా సినిమా ప్రకటిస్తాడని అంతా అనుకున్నారు. కానీ మెగాస్టార్ లూసిఫర్ సినిమా అవకాశం వచ్చినట్లే వచ్చి చేజారిపోయింది.

అదంతా స్క్రిప్ట్ వర్క్ పూర్తి చేసాక మెగాస్టార్ మరో దర్శకుడికి లూసిఫర్ బాధ్యతలు అప్పగించాడు. అప్పటినుండి సుజీత్ తన తదుపరి సినిమా విషయంలో ఏమి తేల్చలేకపోతున్నాడు. షార్ట్ ఫిలింస్ తో గుర్తింపు తెచ్చుకొని సుజీత్.. రన్ రాజా రన్ మూవీతో హిట్ కొట్టి రెండో సినిమానే డార్లింగ్ ప్రభాస్ తో చేసేసాడు. కానీ హిట్ అయితేనే అవకాశాలు వస్తాయనే ఆలోచన చేయలేకపోయాడని ఇండస్ట్రీ వర్గాలు చెబుతున్నాయి. ఇదిలా ఉండగా.. ఇటీవలే బాలీవుడ్ జీ స్టూడియోస్ వారితో ఓ థ్రిల్లర్ సినిమా ఒప్పందం కుదుర్చుకున్నాడట సుజీత్. అయితే తాజా సమాచారం ప్రకారం.. సుజీత్ కన్నడ స్టార్ హీరో సుదీప్ కు స్టోరీ వినిపించాడట. కానీ ఇంకా సుదీప్ నుండి రిప్లై రాలేదని టాక్. చూడాలి మరి సుదీప్ ఎలాంటి నిర్ణయం చెబుతాడో.. మరి ఇప్పుడైనా సుజీత్ ప్రాజెక్ట్ పట్టాలెక్కుతుందేమో..!