ఫ‌స్ట్ లుక్‌: విశాల్ `సామాన్యుడు` అనుకుంటే..!?

వ‌రుసగా భారీ యాక్ష‌న్ ఎంట‌ర్ టైన‌ర్ల‌తో మాస్ లో ప్ర‌త్యేక అభిమానం సంపాదించుకున్నాడు హీరో విశాల్‌. పందెం కోడి మొద‌లు కెరీర్ లో ఎన్నో క్రేజీ బ్లాక్ బ‌స్ట‌ర్ల‌లో న‌టించిన ఈ యంగ్ హీరో ప్ర‌స్తుతం ఓ భారీ యాక్షన్ ఎంట‌ర్ టైన‌ర్ కోసం నూతన దర్శకుడు తు.పా శరవణన్ తో జతకట్టారు. విశాల్ స్వయంగా తన విశాల్ ఫిల్మ్ ఫ్యాక్టరీ (VFF) బ్యానర్ పై ఈ చిత్రాన్ని అత్యంత భారీగా నిర్మిస్తున్నారు.

నేడు (29ఆగ‌స్టు) విశాల్ పుట్టినరోజు సందర్భంగా సినిమా టైటిల్ ఫస్ట్ లుక్ పోస్టర్ ని విడుదల చేశారు. విశాల్ 31 టైటిల్ `సామాన్యుడు`. ఇది `నాట్ ఎ కామన్ మ్యాన్` అనేది ట్యాగ్ లైన్. పోస్టర్ లో రౌడీల బ్యాచ్ ని బేస్ బాల్ బ్యాట్ తో చిత‌క్కొడుతూ విశాల్ ఎగ్రెస్సివ్ గా క‌నిపిస్తున్నారు. విశాల్ మ‌రోసారి దూకుడున్న కుర్రాడిగా కనిపిస్తాడని ఈ పోస్ట‌ర్ చెబుతోంది. పోస్టర్ ట్యాగ్ లైన్ ను సమర్థించేంత అర్థ‌వంతంగా తీర్చిదిద్దారు.

విశాల్ సరసన డింపుల్ హయతి ఈ చిత్రంలో హీరోయిన్ గా నటిస్తోంది. ఈ సినిమాలో యోగి బాబు- బాబురాజ్ జాకబ్- పిఎ తులసి-రవీనా రవి కీలక పాత్రలు పోషిస్తున్నారు. విశాల్ కి కొన్ని చార్ట్ బస్టర్ ఆల్బమ్ లను అందించిన యువన్ శంకర్ రాజా సామన్యుడుకి సంగీతం అందిస్తున్నారు. కవిన్ రాజ్ ఈ చిత్రానికి సినిమాటోగ్రఫీ అందిస్తున్నారు. `సామాన్యుడు` త్వ‌ర‌లో థియేట్రికల్ విడుదలకు సిద్ధమవుతోంది.