సచిన్ సినిమా.. ఏంటీ సైలెన్స్?

ఎప్పుడెప్పుడా అని ఎదురు చూస్తున్న ‘ఎం.ఎస్.ధోని: ది అన్ టోల్డ్ స్టోరీ’ ప్రేక్షకుల ముందుకొచ్చేసింది. ఈ సినిమా అంచనాలకు తగ్గట్లే ఉండటంతో ప్రేక్షకులు బ్రహ్మరథం పడుతున్నారు. ధోని గురించి అన్నీ తెలిసిన విషయాలే కదా.. అతడి జీవితాన్ని సినిమాగా తీస్తే ఏం ఆసక్తి ఉంటుంది అన్నవాళ్లందరూ ‘ఎం.ఎస్.ధోని’ చూసి సైలెంటైపోయారు. థియేటర్లో కూర్చున్న ప్రతి క్రికెట్ అభిమానీ కొన్ని సన్నివేశాలు చూస్తూ ఎంతో ఎమోషనల్ అయిపోయాడు. మరి ధోని విషయంలోనే అలా ఉంటే భారత క్రికెట్ దేవుడు సచిన్ మీద తీసిన సినిమా చూస్తుంటే అతడి అభిమానులకు కలిగే ఉద్వేగం ఎలా ఉంటుందో అంచనా వేయొచ్చు. సచిన్ జీవిత కథతో ‘సచిన్: ఎ బిలియన్ డ్రీమ్స్’ అనే సినిమా తయారవుతున్న సంగతి తెలిసిందే.

ఆ మధ్య రిలీజైన ‘సచిన్’ టీజర్ సినిమాపై విపరీతమైన ఆసక్తిని రేకెత్తించింది. ఐతే తర్వాత ఈ సినిమా వార్తల్లో లేదు. ఈ సినిమా ప్రోగ్రెస్ ఏంటో.. ఎప్పుడు రిలీజవుతుందో తెలియదు. ధోని సినిమా వచ్చేసిన నేపథ్యంలో నెక్స్ట్ ఫోకస్ సచిన్ మూవీ మీదే ఉంది. ఐతే ఇది ‘ధోని’ తరహా ఫీచర్ ఫిల్మ్ కాదు. కొంచెం డాక్యుమెంటరీ టచ్ ఉంటుంది. సచిన్ ఆడిన మ్యాచ్ లకు సంబంధించిన రియల్ విజువల్స్ ఇందులో ఎక్కువగా కనిపిస్తాయి. చిన్నప్పటి జీవితాన్ని మాత్రం నటన ద్వారా చూపిస్తారు. స్వయంగా సచినే ఈ చిత్రాన్ని నరేట్ చేయబోతుండటం విశేషం. ముంబైకి చెందిన ఒక ప్రముఖ చిత్ర నిర్మాణ సంస్థ ‘సచిన్’ సినిమాను నిర్మిస్తుండగా.. బ్రిటన్ కు చెందిన జేమ్స్ ఏర్స్‌కిన్ దర్శకత్వం వహిస్తున్నాడు. ఆస్కార్ విన్నింగ్ మ్యూజిక్ డైరెక్ట‌ర్ ఎ.ఆర్.రెహ‌మాన్ సంగీతాన్నందిస్తున్నాడు. స‌చిన్‌కున్న ఫాలోయింగ్ దృష్ట్యా ఈ చిత్రాన్ని దేశంలోని అనేక భాష‌ల్లోకి అనువాదం చేస్తార‌ని స‌మాచారం.


Like Us on Facebook : https://www.facebook.com/Tupakidotcom/