పవర్ స్టార్ అన్నయ్య ప్లేస్ లో సచిన్

స్మగ్లింగ్ డాన్ గా మూడు రాష్ట్రాల ప్రభుత్వాలను ముప్పతిప్పలు పెట్టిన వీరప్పన్... కన్నడ కంఠీరవ రాజ్ కుమార్ ను కిడ్నాప్ చేయగా.. అతన్ని చంపేందుకు నియమించిన స్పెషల్ ఆఫీసర్ పాత్రలో రాజ్ కుమార్ కొడుకు శివరాజ్ కుమార్ నటించిన సినిమానే కిల్లింగ్ వీరప్పన్. ఈయన తమ్ముడే కన్నడ పవర్ స్టార్ పునీత్ రాజ్ కుమార్.

ఈ కిల్లింగ్ వీరప్పన్ చిత్రాన్ని హిందీలో వీరప్పన్ గా రిలీజ్ చేస్తున్నారు. ఇప్పటికే తెలుగు - కన్నడలో విడుదలైన ఈ చిత్రం హిందీ వెర్షన్ లో.. లీడ్ రోల్ లోకి సచిన్ జోషి వచ్చి చేరడం ఆశ్చర్యం కలిగించింది. రాజ్ కుమార్ ను కిడ్నాప్ చేసిన వీరప్పన్ ను హతమార్చే ఆపరేషన్ ని హ్యాండిల్ చేసిన పోలీస్ ఆఫీసర్ పాత్రలో సచిన్ కనిపించనున్నాడు. సచిన్ కి జోడీగా లీసా రే నటించింది. ఒరిజినల్ వెర్షన్ లో ఈ రెండు పాత్రలను శివరాజ్ కుమార్ - పరుల్ యాదవ్ లు చేశారు. ఒరిజినల్ మూవీలోంచి ఈ పాత్రల సన్నివేశాల వరకూ రీషూట్ చేసి తిరిగి ఈ సినిమాను రూపొందించారు. ఒక రకంగా ఇది రీమేక్ అనే చెప్పాలి.

అయితే.. రీసెంట్ గా విడుదలైన హిందీ వీరప్పన్ ట్రైలర్ లో సచిన్ ని మాత్రం చూపించకపోవడం ఆశ్చర్యం కలిగించే విషయమే. ఈ సచిన్ జోషి అవడానికి ఉత్తరాది వాడే అయినా.. టాలీవుడ్ పైనే ఎక్కువగా మమకారం చూపుతుంటాడు. కానీ కిల్లింగ్ వీరప్పన్ ఇప్పటికే ఇక్కడ రిలీజ్ అయిపోవడంతో.. హిందీ వెర్షన్ లో నటించాడు సచిన్ జోషీ.