థియేట‌ర్లో ఏడ్చిన తేజ హీరోయిన్‌!

చాలా మందికి స్టార్ ఇమేజ్ రావ‌డానికి రెండు మూడు సినిమాలు ప‌డుతుంటాయి. కానీ కొంత మందికి మాత్రం ఒకే ఒక్క సినిమా.. అది కూడా తొలి చిత్రంతోనే స్టార్ ఇమేజ్ సొంతంమ‌వుతూ వుంటుంది.

అలా స్టార్ డైరెక్ట‌ర్ తేజ తెర‌కెక్కించిన `జ‌యం` సినిమాతో హీరోయిన్ గా తెలుగులోకి ఎంట్రీ ఇచ్చి తొలి చిత్రంతో మంచి గుర్తింపుని సొంతం చేసుకుంది హీరోయిన్ స‌దా.. `వెళ్ల‌వ‌య్యా వెళ్లూ..` అంటూ స‌దా చెప్పిన డైలాగ్ ఇప్ప‌టికీ ఎవ‌ర్ గ్రీన్ గానే నిలిచిపోయింది.

`జ‌యం`తో కుర్రాకారు గుండెల్ని కొల్ల‌గొట్టిన స‌దా ఈ మూవీ త‌రువాత అల్ల‌రి న‌రేష్ తో `ప్రాణం`, ఎన్టీఆర్ తో `నాగ‌, మంచు మ‌నోజ్ తో `దొంగ దొంగ‌ది`, ఉద‌య్ కిర‌ణ్ తో `ఔన‌న్నా కాద‌న్నా`, విక్ర‌మ్ తో అప‌రిచితుడు వంటి చిత్రాల్లో న‌టించి తెలుగు ప్రేక్ష‌కుల‌కు మ‌రింత చేరువైంది. `య‌మ‌లీల 2` నుంచి తెలుగు సినిమాల‌కు దూరంగా వుంటూ వ‌స్తోంది. యూట్యూబ్ తో పాటు ప‌లు టీవీ షోల్లో త‌న ఇష్టాఇష్టాలు, అభిప్రాయాల‌ని అభిమానుల‌తో పంచుకుంటూ వ‌స్తోంది.

ఇటీవ‌ల జ‌బ‌ర్ద‌స్త్ షోలోనూ గెస్ట్ గా మెరిసిన స‌దా తాజాగా ఓ థియేట‌ర్లో సినిమా చూస్తూ ఏడ్చేసింది. సినిమా చూస్తూ భావోద్వేగానికి లోనైన స‌దా క‌న్నీళ్లు పెట్టుకుంది. ఇందుకు సంబంధించిన ఓ వీడియో ప్ర‌స్తుతం నెట్టింట వైర‌ల్ గా మారింది.

స‌దా ఎందుకు ఏడ్చింది? ఆమెని అంత‌గా ఏడిపించిన సినిమా ఏంటీ? అని అంతా ఆరా తీస్తున్నారు. అయితే తాజా గా మ‌రో వీడియోని స‌దా సోష‌ల్ మీడియా వేదిక‌గా అభిమానుల‌తో పంచుకుంది.

అడివి వేష్ ప్ర‌ధాన పాత్ర‌లో న‌టించిన చిత్రం `మేజ‌ర్` శ‌శికిర‌ణ్ తిక్క తెర‌కెక్కించిన ఈ మూవీ చూస్తూ స‌దా భావోద్వేగానికి లోన‌య్యాన‌ని తెలిపింది. ఉగ్ర‌దాడి జ‌రిగిన స‌మ‌యంలో తాను ముంబైలోనే వున్నాన‌ని, ఇప్ప‌డు సినిమా చూస్తుంటే ఆ రోజులు గుర్తొచ్చాయ‌ని, కొన్ని స‌న్నివేశాలు రోమాంచితంగా వున్నాయ‌ని, శ‌శికిర‌ణ్ సినిమాని తీసిన తీరు, అడివి శేష్ పాత్ర‌లో ఒదిగిపోయిన విధానం అద్భుతం అని ప్ర‌శంస‌లు కురిపించింది. ప్ర‌స్తుతం ఈ వీడియో నెట్టింట వైర‌ల్ గా మారింది.