రుమర్లపై స్పందించిన సాహో టీం

బాహుబలి సినిమా తర్వాత ప్రభాస్ ఏ స్టార్ డైరెక్టర్ సినిమాకు సై అంటాడా అని ఫ్యాన్స్ అంతా ఆసక్తిగా ఎదురు చూస్తున్న టైం లో రన్ రాజా రన్ అని ఒకే ఒక్క సూపర్ హిట్ అందుకున్న సుజిత్ సినిమాకు ఓకే చెప్పి షాక్ ఇచ్చాడు యంగ్ రెబెల్ స్టార్. భారీ బడ్జెట్ తో యాక్షన్ ఎంటర్టైనర్ గా రూపుదిద్దుకుంటున్న సాహో చిత్రంపై చాలానే అంచనాలు ఉన్నాయి.

సాహో షూటింగ్ పూర్తి కాకముందే జిల్ సినిమా ఫేమ్ రాధ కృష్ణ కుమార్ తో ఒక ప్రేమ కథను ఒప్పుకున్నాడు ప్రభాస్. ఈ సినిమాలో డిజె బ్యూటీ పూజ హెగ్డే ప్రభాస్ పక్కన నటించబోతోంది. ఈ సినిమా ఒప్పుకున్న దగ్గరనుండి సినిమాకు సంబంధించి బోలెడు రూమర్లు ఇండస్ట్రీలో హల్ చల్ చేస్తున్నాయి. కొందరేమో సినిమా షూటింగ్ కు కేవలం 4 నెలలు చాలని అంటుంటే మరికొందరేమో సాహో కంటే ముందే ప్రభాస్ 21వ సినిమా తెరకెక్కుతోంది అని లెక్కలు వేస్తున్నారు. ఇదిలా ఉండగా, సాహో షూటింగుకు ఇంకా చాలా సమయం పడుతుందని వచ్చే సంక్రాంతికి తప్ప రిలీజ్ కుదరదని అంటున్నారు. ఇందులో నిజానిజాలు తెలియక గాబరా పడుతున్న ఫాన్స్ కి సాహో టీం మాటలు ఊరటనిచ్చాయి.

సాహో సంక్రాంతి రేస్ లో పాల్గొనదు అని, సాహో కంటే ముందు ప్రభాస్ 21 సినిమా విడుదల అయ్యే ఛాన్స్ లేదని తేల్చి చెప్పేసింది. అయితే సాహో ఈ సంవత్సరమే విడుదల అవ్వచ్చు అని ఫాన్స్ పండగ చేసుకుంటున్నారు.