సాయి తేజ్ తో మెగా ఫ్యామిలీ దీపావళి సెలబ్రేషన్స్..!

మెగా మేనల్లుడు సాయి ధరమ్‌ తేజ్ ఇటీవల రోడ్డు ప్రమాదంలో తీవ్రంగా గాయపడి కొన్ని రోజుల పాటు ఆసుపత్రిలో చికిత్స తీసుకొని కోలుకున్న సంగతి తెలిసిందే. అయితే హాస్పిటల్ నుంచి డిశ్చార్జ్ అయిన తర్వాత తేజ్ కు సంబంధించిన పిక్ ఒక్కటి కూడా బయటకు రాలేదు. యాక్సిడెంట్ తర్వాత సుప్రీం హీరో ఎలా ఉన్నారో చూడాలని మెగా ఫ్యాన్స్ ఆశగా ఎదురుచూస్తున్నారు. దీపావళి పండుగ సందర్భంగా అభిమానులకు సాయి తేజ్ పునః దర్శనం లభించింది.

దీపావళి సందర్భాన్ని పురస్కరించుకొని మెగా హీరోలంతా సంబరాలు చేసుకున్నారు. సాయి తేజ్ పూర్తి ఆరోగ్యంతో తిరిగి రావడంతో ఆ పండుగ వారి కుటుంబంలో మరింత ప్రత్యేకంగా నిలిచింది. సాయి తేజ్ తో కలిసి మెగాస్టార్ చిరంజీవి - పవన్ కళ్యాణ్ - నాగబాబు - రామ్ చరణ్ - అల్లు అర్జున్ - వరుణ్ తేజ్ - పంజా వైష్ణవ్ తేజ్ - అకీరా నందన్ సంతోషకరమైన క్షణాలను గడిపారు. తేజ్ తో కేక్ కట్ చేయించి శుభాకాంక్షలు తెలిపారు.

సాయి తేజ్ తో మెగా హీరోల దీపావళి సెలబ్రేషన్స్ కు సంబంధించిన ఫోటోను చిరంజీవి సోషల్ మీడియ వేదికగా పంచుకున్నారు. ''అందరి ఆశీస్సులు దీవెనలు ఫలించి సాయి ధరమ్ తేజ్ పూర్తిగా కోలుకున్నాడు. మా కుటుంబ సభ్యులందరికి ఇది నిజమైన పండుగ..'' అని చిరు పోస్ట్ చేశారు. యాక్సిడెంట్ తర్వాత సాయి తేజ్ ఎప్పుడెప్పుడు కనిపిస్తాడా అని ఎదురుచూస్తున్న ఫ్యాన్స్ కు ఈ ఫోటో ఫుల్ ట్రీట్ ఇచ్చినట్లైంది. ఇలా మెగా హీరోలందరూ ఒకచోట చేరి వేడుక చేసుకున్న ఫొటోను చూసి సంతోషం వ్యక్తం చేస్తున్నారు. ఈ మెగా పిక్ ప్రస్తుతం సోషల్ మీడియాలో వైరల్ అవుతోంది.

కాగా, వినాయక చవితి రోజున బైక్‌ పై వెళ్తున్న సాయి ధరమ్‌ తేజ్‌.. ప్రమాదవశాత్తు జారి పడి తీవ్రంగా గాయపడ్డారు. కాలర్‌ బోన్‌ విరగడంతో వైద్యులు సర్జరీ చేయగా.. 35 రోజుల పాటు ఆసుపత్రిలో చికిత్స తీసుకున్నారు. పుర్తిగా కోలుకున్న తర్వాత సాయిధరమ్‌ విజయ దశమి నాడు డిశ్చార్జ్ అయ్యారు. ఈ విషయాన్ని చిరంజీవి స్వయంగా వెల్లడించారు. పెద్ద ప్రమాదం నుంచి బయటపడి పూర్తి ఆరోగ్యంతో తిరిగి వచ్చిన తేజ్‌ కు ఇది పునర్జన్మ అని పేర్కొన్నారు. ఈ క్రమంలో దీపావళి సందర్భంగా తాజాగా సాయి తేజ్ కు సంబంధించిన ఫోటోని కూడా చిరు షేర్ చేశారు. వినాయక చవితి పండగ రోజు ప్రమాదానికి గురై ఆస్పత్రిలో చేరిన సాయి తేజ్‌.. విజయదశమి రోజున ఇంటికి చేరుకోగా.. దీపావళికి బయటకు వచ్చారన్నమాట.