సాయిధరమ్.. మూడు సినిమాల ముచ్చట

‘పిల్లా నువ్వు లేని జీవితం’ లాంటి సక్సెస్ ఫుల్ మూవీతో టాలీవుడ్ లోకి అడుగుపెట్టిన సాయిధరమ్ ఈ గురువారం ‘సుబ్రమణ్యం ఫర్ సేల్’తో ప్రేక్షకుల ముందుకొస్తున్నాడు. దిల్ రాజు లాంటి ప్రముఖ నిర్మాత, హరీష్ శంకర్ లాంటి స్టార్ డైరెక్టర్ సాయితో సినిమా చేయడం విశేషమే. ఈ సినిమా మీద అంచనాలు భారీగానే ఉన్నాయి. ప్రస్తుతం సాయి చేతిలో మూడు ప్రాజెక్టులుండటం విశేషం. అందులో ఒకటి ఆల్రెడీ మొదలైపోయింది. ఇంకో రెండు సెట్స్ మీదికి వెళ్లడానికి సిద్ధంగా ఉన్నాయి. ఈ మూడిట్లో రెండు సినిమాలు కూడా దిల్ రాజు నిర్మాణంలో తెరకెక్కుతుండటం విశేషం.

‘ఓం’ ఫేమ్ సునీల్ రెడ్డి దర్శకత్వంలో తెరకెక్కుతున్న ‘తిక్క’ ప్రస్తుతం షూటింగ్ జరుపుకుంటోంది. లవ్ బ్రేకప్ నేపథ్యంలో యాక్షన్ ఎంటర్ టైనర్ గా ఈ చిత్రాన్ని తెరకెక్కిస్తున్నాడు సునీల్ రెడ్డి. ఈ మధ్యే భారీ ఛేజ్ సీన్స్ చేశారు. ఇక దిల్ రాజు నిర్మించబోయే రెండు సినిమాలూ ఆసక్తికర కాంబినేషన్ లో రూపొందనున్నాయి. ‘పటాస్’ ఫేమ్ అనిల్ రావిపూడి దర్శకత్వంలో ‘సుప్రీమ్’ టైటిల్ తో సినిమా చేయబోతున్నాడు సాయిధరమ్. ఈ సినిమా సుబ్రమణ్యం ఫర్ సేల్ రిలీజ్ కు ముందు రోజు ప్రారంభోత్సవం జరుపుకోబోతోంది.

దిల్ రాజు నిర్మించబోయే మరో సినిమా ‘శతమానం భవతి’. దొంగలబండి - రామదండు లాంటి చిన్న సినిమాలకు దర్శకత్వం వహించిన రచయిత సతీశ్ వేగేశ్న ఈ సినిమాను రూపొందించబోతున్నాడు. కంప్లీట్ ఫ్యామిలీ ఎంటర్ టైనర్ గా ఈ సినిమా తెరకెక్కనుంది. ఇది మొదలవడానికి కొంచెం టైం పడుతుంది. మొత్తానికి వరుసగా క్రేజీ ప్రాజెక్టులతో ఫుల్ బిజీ అయిపోతున్నాడు సాయిధరమ్.