నక్షత్రంలో నా పాత్రేంటో తెలియదు-తేజు

కృష్ణవంశీ కొత్త సినిమా ‘నక్షత్రం’లో సాయిధరమ్ తేజ్.. ఓ అతిథి పాత్ర చేస్తున్న సంగతి తెలిసిందే. ఐతే ఈ పాత్ర వివరాలేమీ తెలియకుండానే తాను ఈ సినిమాకు ఓకే చెప్పినట్లు సాయిధరమ్ తేజ్ వెల్లడించాడు. ‘‘అందులో నాది పోలీస్ పాత్ర అని.. 20 నిమిషాలు ఉంటుందని మాత్రమే తెలుసు. అంతకుమించి వివరాలేమీ తెలియవు. ఐతే కృష్ణవంశీ గారి మీద ఉన్న గౌరవంతో ఏమీ తెలియకుండానే ఈ సినిమా ఒప్పుకున్నా. వివరాలు కూడా అడగలేదు. సినిమాకు సంబంధించి ఆయనకు గొప్ప పరిజ్నానం ఉంది. అలాంటి దర్శకుడితో పని చేయడం నా అదృష్టం. ఈ నెల 16 నుంచి షూటింగులో పాల్గొంటున్నా’’ అని సాయిధరమ్ చెప్పాడు.

ఇక తన మిగతా కొత్త ప్రాజెక్టుల గురించి చెబుతూ.. ‘‘గోపీచంద్ మలినేని దర్శకత్వంలో చేయబోయే సినిమా ఈ నెల 20న మొదలవుతుంది. అది స్పోర్ట్స్ బ్యాక్ డ్రాప్ లో ఉంటుంది. నా కెరీర్లో చాలా వైవిధ్యమైన పాత్ర అది. గౌతమ్ మీనన్ దర్శకత్వంలోనూ ఓ సినిమా చేయబోతున్నాను. అది ఇంకా స్క్రిప్టు దశలోనే ఉంది. కళ్యాణ్ రామ్ గారి కాంబినేషన్లో కూడా ఓ సినిమా చేస్తున్నా. ప్రస్తుతం ఆ సినిమాకు సంబంధించి కూడా డిస్కషన్స్ నడుస్తున్నాయి’’ అని సాయిధరమ్ అన్నాడు. మంచి కథ అనిపిస్తే మల్టీస్టారర్ చిత్రాలు చేయడానికి కూడా తాను సిద్ధమని.. తమ ఇంట్లో చాలామంది నటులున్నా ఎవరికీ ఎవరితోనూ పోటీ లేదని.. తాను తమ ఫ్యామిలీ హీరోలుు ప్రతి ఒక్కరితోనూ ఒక్క సినిమా అయినా చేయాలని ఆశపడుతున్నానని సాయి చెప్పాడు.