హరీష్ గాలి తీసేసిన సాయిధరమ్

గబ్బర్ సింగ్ లాంటి బ్లాక్ బస్టర్ తీసిన ఊపులో ‘రామయ్యా వస్తావయ్యా’ మొదలుపెట్టాడు హరీష్ శంకర్. ఆ సినిమా సెట్స్ మీద ఉండగా హరీష్ కు టాలీవుడ్ లో తిరుగులేని డిమాండ్ ఉంది. ‘రామయ్యా వస్తావయ్యా’ తర్వాత సినిమా కోసం చాలామంది క్యూలో ఉన్నారు. ఐతే ముందు అల్లు అర్జున్ తో కమిటయ్యాడు. కానీ ‘రామయ్యా వస్తావయ్యా’ విడుదల తర్వాత కథ మారిపోయింది. బన్నీ సైడైపోయాడు. హరీష్ కు చాలా గ్యాపొచ్చింది. బన్నీతో తీయాలనుకున్న కథతోనే సాయిధరమ్ ను హీరోగా పెట్టి తీయడానికి రెడీ అయ్యాడు. ఇదీ టాలీవుడ్ వర్గాల్లో వినిపించిన సమాచారం.

కానీ ‘సుబ్రమణ్యం ఫర్ సేల్’ ఆడియో ఫంక్షన్ లో మాత్రం హరీష్ కొత్త కథ వినిపించాడు. ‘‘ఒక్కో స్క్రిప్టు ఒక్కొక్కరిని వెదుక్కుంటూ వెళ్తుందంటారు. సుబ్రమణ్యం ఫర్ సేల్ తేజును వెతుక్కుంది. ఈ సినిమాకు తేజు వంద శాతం పర్ఫెక్ట్’’ అని చెప్పాడు హరీష్. గబ్బర్ సింగ్ సినిమా సిట్టింగ్స్ సందర్భంగా పవన్ కళ్యాణ్ ఇంట్లో తేజును చూశానని.. చూడగానే తన సుబ్రమణ్యం క్యారెక్టర్ కి అతనే పర్ఫెక్ట్ అని ఫిక్సయిపోయానని కూడా కూడా అన్నాడు. కానీ హరీష్ మాటల్లో వాస్తవం లేదని.. సాయిధరమ్ మాటల్ని బట్టి తేలిపోయింది.

సాయిధరమ్ మాట్లాడుతూ.. సుబ్రమణ్యం ఫర్ సేల్ వేరే వాళ్లు చేయాల్సిందని... కానీ అనుకోకుండా తాను చేశానని చెప్పి హరీష్ గాలి తీసేశాడతను. తానీ పాత్ర చేయగలనా అని చాలా అనుమానంగా ఉండేదని.. కానీ హరీష్ తనకెంతో కాన్ఫిడెన్స్ ఇచ్చి.. తనతో ఈ క్యారెక్టర్ చేయించాడని చెప్పుకొచ్చాడు సాయి. మొత్తానికి హరీష్ ఎంత కప్పిపుచ్చుదామని చూసినా.. అసలు విషయం దాగలేదు.