రంగంలోకి దిగడానికి రెడీ అవుతున్న సాయితేజ్!

సాయితేజ్ హీరోగా ఎంట్రీ ఇచ్చిన దగ్గర నుంచి వరుస సినిమాలు చేసుకుంటూ వెళుతున్నాడు. జయాపజయాలను సమానంగానే స్వీకరిస్తూ ముందుకు వెళుతున్నాడు. తన తాజా సినిమా ఫ్లాప్ అయినా ఆయన డీలాపడిపోకుండా .. తదుపరి సినిమాను పట్టాలకెక్కించే విషయంలో జాప్యం చేయకుండా పనులను చక్కబెడుతున్నాడు. అయితే కొంతకాలంగా .. అంటే, 'చిత్రలహరి' సినిమా తరువాత సాయితేజ్ కి హిట్ పడలేదు. ఆ తరువాత ఆయన చేసిన మూడు సినిమాలు ఆశించిన స్థాయిలో ఆడలేదు.

ఇక ఈ నేపథ్యంలోనే ఆయన బీవీఎస్ ఎన్ ప్రసాద్ నిర్మాణంలో .. కార్తీక్ వర్మ దండు దర్శకత్వంలో ఒక సినిమా చేయాలనుకున్నాడు. అయితే ఈ లోగానే ఆయన బైక్ పై నుంచి పడిపోవడం .. చాలా రోజుల పాటు హస్పిటల్లోనే ఉండటం జరిగింది. దీపావళి రోజునే ఆయన చిరంజీవి ఇంటికి రావడం .. అక్కడ అంతా గ్రూప్ ఫొటో దిగడం జరిగింది. ఆ ఫొటోలోనే అంతా సాయితేజ్ ఎలా ఉన్నాడనేది చూశారు. సాయితేజ్ పూర్తిగా కోలుకున్నాడనే విషయాన్ని నమ్మారు. ఈ నేపథ్యంలోనే జనవరి నుంచి సాయితేజ్ షూటింగుకు హాజరు కానున్నట్టుగా వార్తలు వస్తున్నాయి.

'రిపబ్లిక్' సినిమా తరువాత ఆయన ఏదైతే సినిమా చేయాలనుకున్నాడో, ఆ సినిమానే ఆయన సెట్స్ పైకి తీసుకెళ్లనున్నట్టు తెలుస్తోంది. గతంలో 'భం బోలేనాథ్' సినిమాకి దర్శకత్వం వహించిన కార్తీక్ వర్మ దండుతోనే సాయితేజ్ సినిమా ఉండనుందని అంటున్నారు. ఈ దర్శకుడు 'కార్తికేయ' సినిమాకి రైటింగ్ డిపార్టుమెంటులో పనిచేశాడు కూడా. ఈ డైరెక్టర్ వినిపించిన కథలోని కొత్తదనం నచ్చడం వలన సాయితేజ్ ఇంట్రెస్ట్ చూపిస్తున్నాడని అంటున్నారు.

ఇక మరికొందరు యువ దర్శకులు కూడా సాయితేజ్ తో సినిమాలు చేయడానికి సిద్ధంగా ఉన్నారు. ఆల్రెడీ కొన్ని కథలు వినేసిన సాయితేజ్ తన నిర్ణయం చెప్పవలసినవి ఉన్నాయి. తన సినిమాలు తను ఆశించిన స్థాయికి చేరుకోకపోవడానికి .. మార్కెట్ ను పెంచకపోవడానికి గల కారణాలను గుర్తించిన సాయితేజ్, ఇకపై కొత్త ప్రణాళిక ప్రకారం ముందుకు వెళ్లాలని నిర్ణయించుకున్నట్టుగా చెబుతున్నారు. త్వరలోనే పూర్తి వివరాలు తెలియనున్నాయి.