ఆ డైరెక్టర్ కొత్త సినిమా.. చిలిపి దయ్యం

‘వినాయకుడు’ లాంటి సెన్సిబుల్ సినిమాతో దర్శకుడిగా అరంగేట్రంలోనే మంచి పేరు సంపాదించాడు సాయికిరణ్ అడివి. ఆ తర్వాత ‘విలేజ్‌ లో వినాయకుడు’, ‘కేరింత’.. సినిమాలు కూడా సాయికిరణ్ ప్రతిభను చాటాయి. ‘విలేజ్ లో వినాయకుడు’ తర్వాత బాగా గ్యాప్ తీసుకుని దిల్ రాజు బేనర్లో ‘కేరింత’ తీసిన సాయికిరణ్ ఇప్పుడు తన స్వీయ నిర్మాణంలో కొత్త సినిమా మొదలుపెడుతున్నాడు. ఆ సినిమానే.. చిలిపి దయ్యం. ‘కేరింత’ తర్వాత ఆరు నెలలు కూర్చుని ‘చిలిపి దయ్యం’ స్క్రిప్టు తయారు చేసుకున్న సాయికిరణ్.. త్వరలోనే సినిమాను సెట్స్ పైకి తీసుకెళ్లబోతున్నాడు.

సాయికిరణ్ తమ్ముడు అడివి శేష్ తో పాటు ‘కేరింత’ సినిమాలో నూకరాజు పాత్రతో నవ్వించిన పార్వతీశం ఈ చిత్రంలో ప్రధాన పాత్రలు పోషించబోతున్నారు. ‘కేరింత’ సినిమాతోనే పరిచయమైన సుకృతి ఈ సినిమాలో హీరోయిన్‌ గా నటించనుంది. ఔట్ అండ్ ఔట్ కామెడీ ఎంటర్‌ టైనర్ గా ఈ సినిమా రూపొందబోతోందని సాయికిరణ్ వెల్లడించాడు. త్వరలోనే ఈ ప్రాజెక్టుకు సంబంధించిన పూర్తి వివరాలు వెల్లడిస్తానని.. ఫిబ్రవరిలో షూటింగ్ మొదలవుతుందని సాయికిరణ్ తెలిపాడు. ‘చిలిపి దయ్యం’ అంటున్నాడంటే బహుశా ఇది హార్రర్ కామెడీ అయి ఉండొచ్చేమో. తెలుగులో ఈ జానర్లో వచ్చిన సినిమాలు చాలా వరకు బాగా ఆడాయి. మరి సాయికిరణ్ కూడా ఆ కోవలోనే సక్సెస్ సాధిస్తాడేమో చూద్దాం.