సాయి పల్లవి ఫుట్ బాల్ ఆడుతోంది

సాధారణంగా స్టార్డమ్ వచ్చిన వెంటనే చాలామంది సెలబ్రిటీలు చేసే పని ఏంటంటే.. ఫుట్ బాల్ ఆడుతుంటారు. పర్సనల్ స్టాఫ్‌ నుండి పెద్ద పెద్ద ప్రొడ్యూసర్ల వరకు.. పక్కనే ఉన్న హీరోల నుండి పర్సులో పడిన రెమ్యూనరేషన్ వరకు.. ఇలా అన్ని విషయాల్లోనూ మనోళ్ళు ఫుట్ బాల్ ఆడేస్తుంటారు. ఇకపోతే ఆల్రెడీ సాయిపల్లవి వంటి స్టార్ పై ఉన్న రూమర్లు దృష్ట్యా.. ఖచ్చితంగా అందరూ దీని గురించే అనుకుంటున్నారేమో.. మనం చెబుతోంది ఆ ఫుట్ బాల్ గురించి కాదు సుమీ.

ఇప్పుడు చాలామంది నటీమణులు స్ర్కీన్ పై ఏదన్నా వైవిధ్యబరితమైన పాత్రలను పోషించడానికి ఇష్టపడుతున్నారు. డియర్ కామ్రేడ్ సినిమాలో హీరోయిన్ రష్మిక మందన్నా క్రికెటర్ గా కనిపించబోతోంది. అలాగే సూర్మ అనే బాలీవుడ్ లో సినిమా కోసం హాకీ బ్యాట్ చేతపట్టింది తాప్సీ. ఇప్పుడు నేనేం తక్కువ అన్నట్లు సాయిపల్లవి కూడా ఫుట్ బాల్ ఆడుతోంది అంటున్నారు ఫిలిం నగర్ జనాలు. శర్వానంద్ తో హనురాఘవపూడి డైరక్షన్లో చేస్తున్న పడి పడి లేచె మనస్సు సినిమాలో ఆమె ఫుట్ బాల్ ప్లేయర్ గా కనిపించనుందట.

అయితే ఈ సినిమాలో ఒక కొత్త ప్రేమ కథ చెబుతున్నారు అని ఎప్పటినుండో టాక్ ఉంది కాని.. ఇలా ఫుట్ బాల్ నేపథ్యంలో సాగుతోంది అనేది మాత్రం ఎవ్వరికీ తెలియని అంశం. మరి ఈ రూమర్లో ఎంత వరకు నిజం ఉందో.. సాయిపల్లవి నిజంగానే ఫుట్ బాలు ఆడుతుందో లేదో తెలియాలంటే.. టీజర్ వచ్చే వరకు ఆగాల్సిందే.