'లవ్ స్టోరీ'తో సాయి పల్లవి మరోసారి ఫిదా చేసేలా ఉందిగా..!

సెన్సిబుల్ డైరెక్టర్ శేఖర్ కమ్ముల దర్శకత్వంలో నాగచైతన్య - సాయి పల్లవి హీరో హీరోయిన్లుగా నటిస్తున్న సినిమా 'లవ్ స్టోరీ'. సాయి పల్లవి పుట్టినరోజు సందర్భంగా ఈ సినిమాలో ఆమెకి సంబంధించిన ఒక పోస్టర్ రిలీజ్ చేసారు. ఈ పోస్టర్‌ ను హీరో నాగ చైతన్య షేర్ చేస్తూ సాయి పల్లవికి బర్త్ డే విషెస్ తెలిపాడు. ఈ పోస్టర్ లో సాయి పల్లవిని చూస్తుంటే తెలుగు ఆడియన్స్ ని మరోసారి ఫిదా చేయబోతోంది అని అర్థం అవుతోంది. వర్షంలో తడుస్తున్న సాయి పల్లవిని చూసి యువ హృదయాలు తడవడం ఖాయంగా కనిపిస్తుంది. దీంతో సాయి పల్లవికి మరొక సాలిడ్ హిట్ పడినట్లే అని సినీ అభిమానులు అభిప్రాయపడుతున్నారు. ఇప్పటికే సాయి పల్లవి - రానా జంటగా నటిస్తున్న 'విరాటపర్వం' సినిమా నుండి కూడా ఆమెకి సంబంధించిన ఫస్ట్ లుక్ విడుదల చేసారు.

సున్నితమైన ప్రేమ‌క‌థ‌ల‌ని ఎంతో అందంగా తెర‌కెక్కించ‌డంలో దిట్ట డైరెక్టర్ శేఖ‌ర్ క‌మ్ముల‌. ఆయన గత చిత్రాలు 'ఆనంద్' 'హ్యాపీడేస్' 'గోదావరి' 'ఫిదా' లాంటి సినిమాలు గమనిస్తే ఎక్కడ చూసినా మనకు ప్రేమే కనిపిస్తుంది. శేఖర్ కమ్ముల సినిమాలలో అనుబంధాలు పెనవేసుకునేలా పాత్రల చిత్రీకరణ ఉంటుంది. ఇక 'లవ్ స్టోరీ' సినిమాతో మరోసారి నాగ చైతన్య - సాయి పల్లవి జంటతో తెలుగు ప్రేక్షకులను మెప్పించడం ఖాయమనిపిస్తోంది. ఇప్ప‌టికే 'ల‌వ్ స్టోరీ' చిత్రానికి సంబంధించి టీజ‌ర్.. సాంగ్ లిరిక‌ల్ వీడియోలు విడుదల కాగా అవి విశేష ఆదరణ పొందాయి. ఇప్పుడు తాజాగా రిలీజ్ చేసిన సాయి పల్లవి పోస్టర్ కూడా అందర్నీ కట్టిపడేస్తోంది. 'ఫిదా' సినిమాలో తన నటనతో కుర్రకారుని ఫిదా చేసిన ఈ ముద్దుగుమ్మ మరోసారి తన మ్యాజిక్ చూపించేలా ఉంది. కాగా చైతూతో కలిసి ఆమె నటించడం ఇదే ఫస్ట్ టైం.. అందుకే వీరి జోడీపై అంచనాలు పెరిగాయి. ఏసియన్ డిస్ట్రిబ్యూషన్ కంపెనీ ఈ సినిమాతో మూవీ ప్రొడక్షన్ లోకి దిగుతోంది. నారాయణదాస్ నారంగ్ మరియు ఎఫ్.డి.సి చైర్మైన్ రామ్మోహనరావు కలిసి నిర్మిస్తున్న ఈ చిత్రాన్ని సమ్మర్ కానుకగా విడుదల చేయాలని భావించారు. కానీ కరోనా కారణంగా వాయిదా పడింది. లాక్ డౌన్ ఎత్తేసిన తర్వాత నిర్మాణాంతర పనులను పూర్తి చేసుకొని వీలైనంత త్వరగా 'లవ్ స్టోరీ'ని ప్రేక్షకుల ముందుకు తీసుకురావాలని చిత్ర బృందం భావిస్తోంది.