2018లో కూడా ఆ పిల్ల జోరు

ఈ ఏడాది మలయాళం నుంచి వచ్చి తెలుగులో అడుగుపెట్టిన హీరోయిన్స్ చాలా మందే ఉన్నారు. అయితే అందులో ఎక్కువగా పాపులర్ అయ్యింది మాత్రం సాయి పల్లవి అని చెప్పాలి. కేవలం ఒకే ఒక్క సినిమాతో అందరిని ఫిదా చేసి హీరోల రేంజ్ లో క్రేజ్ ను సంపాదించుకుంది. న్యాచురల్ అందానికి నవ్వును జోడిస్తూ కుర్రకారు మనసులను గెలుచుకుంది. ఇక తన నటన గురించి ఎంత చెప్పినా కూడా తక్కువే.

చూస్తుంటే అమ్మడు నెక్స్ట్ ఇయర్ కూడా కొన్ని మంచి ప్రాజెక్టులతో స్టార్ హీరోయిన్ అయ్యేలా ఉంది. ప్రస్తుతం సాయి పల్లవి చేతిలో మూడు సినిమాలు ఉన్నాయి. అవి ఏ మాత్రం క్లిక్ అయినా ఫిదా పిల్లకు డిమాండ్ చాలా పెరుగుతుంది. టాలీవుడ్ లో శర్వానంద్ సరసన ఇటీవల ఛాన్స్ కొట్టేసింది. హను రాఘవపూడి దర్శకత్వంలో రొమాంటిక్ లవ్ స్టోరీగా ఆ సినిమా తెరకెక్కనుంది. ఆ జోడి లో వచ్చే రొమాంటిక్ సీన్స్ ఎలా ఉంటాయా అని ఓ వర్గం ప్రేక్షకులు చర్చించుకుంటున్నారు. ఇక కోలీవుడ్ లో కూడా సాయి పల్లవి రెండు మంచి ఆఫర్లను కొట్టేసింది. ఇప్పటికే అక్కడ కణం అనే సినిమాను చేస్తోంది. మరికొన్ని రోజుల్లో ఆ సినిమా రిలీజ్ కానుంది. అయితే వాటితో పాటు ధనుష్ మారి సీక్వెల్ లో కూడా అఫర్ కొట్టేసింది. ఆ సినిమా షూటింగ్ త్వరలో స్టార్ట్ కానుంది. ధనుష్ సినిమాలో సాయి పల్లవి క్యారెక్టర్ పై అంచనాలు బాగానే ఉన్నాయి.

ఇక సూర్యతో చేసే సినిమాలోను ఈ భామ డిఫెరెంట్ క్యారెక్టర్ లో కనిపించనుందట. 7/g బృందావన కాలనీ - ఆడవారి మాటలకూ అర్ధాలే వేరులే వంటి సినిమాలతో కోలీవుడ్ టాలీవుడ్ లో మంచి గుర్తింపు తెచ్చుకున్న సెల్వా రాఘవన్ ఆ సినిమాకు దర్శకత్వం వహించబోతున్నాడు. సాయి పల్లవి చేసే ఈ సినిమాలన్నీ 2018లోనే హైలెట్ అవ్వనున్నాయని తెలుస్తోంది. మరి ఎంతవరకు ఫిదా చేస్తుందో చూడాలి.