సాయి పల్లవి కల నెరవేరిందట

సాయిప‌ల్ల‌వి ఏ ఇండ‌స్ట్రీ కెళితే... అక్క‌డ ఒకే ఒక్క సినిమాతో స్టార్ హీరోయిన్ అయిపోతోంది. తెలుగులో ‘ఫిదా’ సినిమాతో అంద‌రినీ మాయ చేసి బిజీ హీరోయిన్ గా మారిపోయిన సాయిప‌ల్ల‌వి... అంత‌కు ముందే మ‌ల‌యాళంలో ‘ప్రేమ‌మ్‌’ సినిమా చేసి మ‌లార్ గా కుర్రాళ్ల మ‌న‌సు దోచుకుంది. ఇప్పుడు స్వంత భాష త‌మిళంలో వ‌రుస సినిమాలు చేస్తోందీ పిల్ల‌.

ఫిదా పిల్ల త‌మిళంలో చేసిన మొద‌టి సినిమా ‘కరు’. తెలుగులో ‘క‌ణం’ పేరుతో రూపొందిన ఈ సినిమాలో నాగ‌శౌర్య ప‌క్క‌న న‌టించింది సాయి ప‌ల్ల‌వి. షూటింగ్ స‌మ‌యంలో వీరి మ‌ధ్య విభేదాలు రావ‌డంతో చాలా ఆల‌స్యంగా షూటింగ్ పూర్తి చేసుకున్న ‘క‌ణం’ సినిమా... త‌మిళ‌నాడులో కొన‌సాగుతున్న థియేట‌ర్ల స‌మ్మె కార‌ణంగా విడుద‌ల వాయిదా ప‌డింది. రెండు భాష‌ల్లో ఒకేసారి విడుద‌ల చేయాల‌ని నిర్మాత‌లు ఆలోచిస్తుండ‌డంతో తెలుగులో ఎప్పుడు విడుద‌ల అవుతుందో తెలియ‌ని పరిస్థితి. అయితే మొద‌టి సినిమా విడుద‌ల కాక‌ముందే సూర్య స‌ర‌స‌న ‘ఎన్ జీ కే’ సినిమాలో న‌టిస్తోంది సాయి ప‌ల్ల‌వి. ‘చిన్న‌ప్ప‌టి నుంచి సూర్య అంటే నాకెంతో ఇష్టం. ఆయ‌న‌తో న‌టించాల‌నేది నా క‌ల‌... ఇలా నెర‌వేర‌డం సంతోషంగా ఉంది’ అంటూ ఉబ్బిత‌బ్బివ‌వుతోంది ఈ చిన్న‌ది.

అలాగే తమిళ స్టార్ హీరో ధ‌నుష్ స‌ర‌స‌న ‘మారి 2’ సినిమాలో న‌టిస్తోంది సాయిప‌ల్ల‌వి. ‘షూటింగ్ లో నేను టెన్ష‌న్ ప‌డుతుంటే... ధ‌నుష్ జోకులేసి న‌వ్వించి... నా కంగారును మాయం చేస్తాడు...’ అంటోంది సాయిప‌ల్ల‌వి. కోలీవుడ్ లో కాస్త‌ బానే ఉంది కానీ టాలీవుడ్ కి వ‌చ్చేస‌రికి సాయిప‌ల్ల‌వి... షూటింగ్ కి బాగా ఆల‌స్యంగా వ‌స్తుంద‌నే టాక్ వినిపిస్తోంది దీనికేమంటుందో ఫిదా బ్యూటీ.