డాలర్లు వద్దన్న భానుమతి

స్టార్ డం మహత్యమే అంత. ఒక్క సినిమాతో జాతకాన్ని అమాంతం మార్చేస్తుంది. అంతెందుకు ఒక్క టీజర్ ప్రియా ప్రకాష్ వారియర్ కు ఎంత పాపులారిటీ తెచ్చిందో చూసాం కదా. అదేం విచిత్రమో కాని కళ్ళు చెదిరే అద్భుత సౌందర్య రాసులు అనిపించేంత గొప్పగా లేకపోయినా కేరళ భామల్లో ఏదో మేజిక్ ఉండబట్టే ఇలా ఒకరిని మించి ఒకరు మనసులు దోచేస్తున్నారు. ఫిదాతో చేసిన మాయ ఏడాదికి సమీపిస్తున్నా సాయి పల్లవి డిమాండ్ మాత్రం అంతకంతకు పెరుగుతూ పోతోంది. వరుణ్ తేజ్, నాని లాంటి యూత్ హీరోస్ మొదలుకొని సూర్య, ధనుష్ లాంటి సీనియర్ స్టార్ హీరోల దాకా తనే బెస్ట్ ఛాయస్ గా మారుతోంది. మరి ఇంత ఇమేజ్ సంపాదించుకున్న సాయి పల్లవిని ఫారిన్ ఈవెంట్ సంస్థలు చూస్తూ వదిలిపెడతాయా.

ఇటీవలే అమెరికాలో యాక్టివ్ గా ఉన్న ఒక తెలుగు సంస్థ నిర్వహించే ఈవెంట్ కోసం సాయి పల్లవి కి ఆఫర్ ఇచ్చారు. 20 వేల డాలర్ల రెమ్యునరేషన్ తో పాటు ఫస్ట్ క్లాస్ బిజినెస్ క్యాటగిరీలో అప్ అండ్ డౌన్ ఫ్లైట్ టికెట్స్ ప్లస్ అక్కడ వసతి కోసం ఖరీదైన హోటల్ లో కోరుకున్న వసతులతో అన్ని ఏర్పాటు చేస్తామని హామీ ఇచ్చారట. మరి ఇంకేం ఏదో ఒక రోజు అడ్జస్ట్ చేసుకుని హ్యాపీగా వెళ్ళవచ్చుగా అనిపిస్తుంది. కాని తను హైబ్రిడ్ పిల్ల. షూటింగ్స్ లో బిజీ ఉన్నాను, కుదరదు అని చెప్పేసిందట. అదే ఈవెంట్ కోసం మొన్నటి దాకా టాప్ హీరొయిన్ గా వెలిగి ఈ మధ్యే బాలీవుడ్ లో ఫెయిల్ అయిన హీరొయిన్ 10 వేల డాలర్లకే వస్తానన్నా తూచ్ అని వెళ్లిపోయారట.

ఇది సాయి పల్లవి రేంజ్. దీపముండగానే ఇల్లు చక్కదిద్దుకోవాలి సామెత తరహాలో అమెరికా ఈవెంట్ ల మీద వచ్చే డబ్బుల కన్నా ఇక్కడ సినిమాల షూటింగే ముఖ్యమంటున్న సాయి పల్లవి కొత్త సినిమా కణం విడుదలకు సిద్ధంగా ఉంది. డేట్ ఇంకా ప్రకటించాల్సి ఉంది. మొదటిసారి థ్రిల్లర్ మూవీలో నటిస్తున్న సాయి పల్లవి దాని రిజల్ట్ మీద గట్టి నమ్మకంతో ఉంది.