ఇలాంటి పాత్రలో చేయడం ఫస్టు టైమ్: సాయిపల్లవి

సాయిపల్లవి ముందుగా తమిళ .. మలయాళ సినిమాల ద్వారా వెండితెరకి పరిచయమైనప్పటికీ, ఆ తరువాత తెలుగులోనే స్టార్ హీరోయిన్ గా ఎదుగుతూ వచ్చారు. తెలుగులో ఆమెకి యున్న ఫాలోయింగ్ అంతా ఇంతా కాదు. యూత్ లో మంచి క్రేజ్ తెచ్చుకున్న సాయిపల్లవి, ఫ్యామిలీ ఆడియన్స్ నుంచి మంచి మార్కులు కొట్టేశారు' సాయిపల్లవి ఉంటే ఆ సినిమాకి ఫ్యామిలీతో కలిసి వెళ్లవచ్చనే ఒక నమ్మకాన్ని ఆమె ఆడియన్స్ లో కల్పించగలిగారు. 'లవ్ స్టోరి' .. 'శ్యామ్ సింగ రాయ్' హిట్స్ తరువాత ఆమె చేసిన 'విరాటపర్వం' ఈ నెల 17వ తేదీన థియేటర్స్ కి రానుంది.

ఈ నేపథ్యంలో నిర్వహించిన ఈ సినిమా ప్రీ రిలీజ్ ఈవెంటులో సాయిపల్లవి మాట్లాడుతూ .. "మాకు బ్లెస్సింగ్స్ ఇవ్వడానికి వచ్చిన వెంకటేశ్ గారికి ముందుగా థ్యాంక్స్ చెబుతున్నాను. ఈ సినిమా పూజా కార్యక్రమాల రోజున కూడా వెంకటేశ్ గారు వచ్చారు. ఆ రోజున నాకు ఎంత హ్యాపీగా ఉందో .. ఈ రోజున కూడా అంతే హ్యాపీగా ఉంది. ఇక ఇక్కడికి వచ్చిన సినిమా ప్రేమికులందరికీ కూడా ధన్యవాదాలు తెలియజేస్తున్నాను.

'విరాటపర్వం' సినిమా నా జీవితంలో ఒక ముఖ్యమైన సినిమాగా నిలిచిపోతుంది. రియల్ లైఫ్ లో ఉన్న ఒక పాత్రను తీసుకుని చేయడం నా కెరియర్ లో ఇది ఫస్టు టైమ్. అందువలన చాలా కొత్తగా అనిపించింది నాకు. మీకు కూడా అలాగే అనిపిస్తుంది. ఇలాంటి ఒక పాత్రకు నేను సెట్ అవుతానని ఊహించుకుని నాకు ఛాన్స్ ఇచ్చిన వేణుగారికి థ్యాంక్స్ చెబుతున్నాను. ఈ సినిమా కోసం నేను రానా గారు మాత్రమే కాదు .. టెక్నీషియన్స్ ఎంత కష్టపడ్డారనేది మీరు థియేటర్ కి వచ్చి చూడాలి.

ప్రతి సినిమాను నేను నా పాపలానే చూసుకుంటూ ఉంటాను. కానీ ఈ సినిమా విషయానికి వచ్చేసరికి నేను అన్ని బాధ్యతలను నిర్మాతలపైనే పెట్టేశాను. ఈ సినిమాలో రానాగారితో కలిసి పనిచేయడం చాలా సంతోషంగాను .. గర్వంగాను ఉంది. తెలుగు సినిమా స్థాయిని పెంచే విషయంలో ఆయన ఆలోచనా విధానం నాకు బాగా నచ్చుతుంది. కొత్తదనం ఉన్న సినిమాలను మీరు ఎప్పుడూ ఆదరిస్తూనే వస్తున్నారు. అలాగే ఈ సినిమాను కూడా ఆదరిస్తారని భావిస్తున్నాను. మీ ప్రేమకు కోటి ధన్యవాదాలు" అని చెప్పుకొచ్చారు. ఇక సాయిపల్లవి మాట్లాడుతున్నప్పుడు ఆమె వెనుక స్క్రీన్ పై 'లేడీ పవర్ స్టార్' అంటూ వేయడం చూసి సంతోషంతో ఆమె ఉక్కిరి బిక్కిరి అయ్యారు.