ఆ సీక్వెల్ లో క్రీమ్ బిస్కెట్ బ్యూటీ

వచ్చిండే.. మెల్లమెల్లగా వచ్చిండే.. క్రీమ్ బిస్కెట్ వేసిండే.. అంటూ ఫిదా మూవీలో సాయి పల్లవి ఆడిపాడిన తీరును.. టాలీవుడ్ ఆడియన్స్ ఇప్పట్లో మర్చిపోలేరు. ఓ సినిమా ఒప్పుకోవడంలో తన పాత్రకు తగిన ప్రాధాన్యతను మాత్రమే పరిశీలించే మలయాళ కుట్టి సాయి పల్లవి.. ఇప్పుడు తమిళ్ లో ఓ క్రేజీ ప్రాజెక్టుకు ఎంపికైంది.

ధనుష్ కెరీర్ లో బిగ్గెస్ట్ హిట్ అయిన మారి చిత్రానికి ఇప్పుడు సీక్వెల్ తెరకెక్కనుండగా.. ఈ మూవీలో సాయి పల్లవి హీరోయిన్ గా నటిస్తోందంటూ.. యూనిట్ ప్రకటించింది. మారి2 మూవీలో లీడ్ హీరోయిన్ పాత్రను ఈ ప్రేమమ్ బ్యూటీ చేయబోతోందని.. సినిమా యూనిట్ అనౌన్స్ చేసింది. బాలాజీ మోహన్ దర్శకత్వంలో మారి చిత్రం రూపొందగా.. ఇప్పుడు అదే దర్శకుడు సీక్వెల్ ను కూడా రూపొందించబోతున్నాడు. ప్రస్తుతం మారి2కి సంబంధించిన ప్రీ ప్రొడక్షన్ పనులు పూర్తి కానున్నాయి. వండర్ బార్ ఫిలిమ్స్ బ్యానర్ పై.. హీరో ధనుష్ స్వయంగా ఈ మూవీ నిర్మించనుండగా.. మలయాళీ యాక్టర్ టోవినో థామస్ విలన్ గా నటించనున్నాడు.

మారి చిత్రం తెలుగులో మాస్ పేరుతో రిలీజ్ అయి తెలుగు ప్రేక్షకులను ఆకట్టుకోగా.. ఇప్పుడు టాలీవుడ్ లో సాయిపల్లవికి ఉన్న క్రేజ్ ను బేస్ చేసుకుని.. తెలుగులో కూడా విడుదల చేసేలా షూటింగ్ చేయబోతున్నారు. ప్రస్తుతం నాని నటిస్తున్న ఎంసీఏ-మిడిల్ క్లాస్ అబ్బాయిలో కూడా సాయి పల్లవి హీరోయిన్ గా నటిస్తోంది.