రానా వచ్చేలోపు అంతా సాయిపల్లవే!

టాలీవుడ్ లో చాలామందే హీరోయిన్లు ఉన్నారు కానీ వారిలో సాయిపల్లవికి ప్రత్యేకమైన స్థానం ఉంది. 'ఫిదా' తప్ప ఇప్పటివరకూ తెలుగులో మరో బ్లాక్ బస్టర్ సాయిపల్లవి ఖాతాలో లేకపోయినా తనకు ప్రేక్షకుల్లో మంచి క్రేజ్ ఉంది. సాయిపల్లవి చేతిలో ప్రస్తుతం రెండు ప్రాజెక్టులు ఉన్నాయి. అందులో ఒకటి 'విరాటపర్వం' కాగా రెండవది నాగచైతన్య - శేఖర్ కమ్ముల కాంబినేషన్ లో తెరకెక్కనున్న మరో చిత్రం.

రానా దగ్గుబాటి హీరోగా వేణు ఉడుగుల దర్శకత్వంలో తెరకెక్కుతున్న 'విరాటపర్వం' చిత్రాన్ని పోయిన నెలలోనే లాంచ్ చేశారు. షూటింగ్ కూడా మొదలు పెట్టారట.. నిజానికి ఈ సినిమా షూటింగ్ కోసం సాయిపల్లవి ఈ ఏడాది జనవరి నుండే కాల్ షీట్స్ ఇచ్చిందట. కానీ పలు కారణాల వల్ల రానా షూటింగ్ లో జాయిన్ కాకపోవడంతో సినిమాను లాంచ్ చేయడం డిలే అయింది. అప్పటికే షూటింగ్ ప్రారంభం అవుతుందని చాలా నెలలు వేచి చూసిన సాయిపల్లవి ఇక లాభం లేదనుకొని ఈ సినిమా నుండి డ్రాప్ అవుతానని మేకర్స్ కు వెల్లడించిందట. సాయి పల్లవి ని మిస్ చేసుకోవడం ఇష్టం లేని 'విరాటపర్వం' టీమ్ వెంటనే షూటింగ్ షెడ్యూల్స్ ప్లాన్ చేసి సినిమాను హడావుడిగా లాంచ్ చేశారట. రానా ప్రస్తుతం అమెరికాలో ఉన్న సంగతి తెలిసిందే. రానా 'విరాటపర్వం' షూట్ లో జాయిన్ అయ్యేలోపు సాయి పల్లవి పాత్రకు సంబంధించిన సోలో సీన్స్.. ఫ్యామిలీతో కలిసి ఉన్న ఇతర సీన్స్ పూర్తి చేసేలా షూటింగ్ ప్లాన్ చేశారట.

ఇదిలా ఉంటే శేఖర్ కమ్ముల సినిమాను సెప్టెంబర్ నుండి ప్రారంభించడానికి సన్నాహాలు చేసుకుంటున్నాడట. ఇప్పటికే నాగ చైతన్య.. సాయిపల్లవి తమ డేట్స్ కూడా ఇవ్వడం జరిగిందని సమాచారం. కమ్ముల సార్ సినిమా షూటింగ్ ఏకధాటిగా మూడు నెలలపాటు చేస్తారట. సో.. ఆ లోపే సాయిపల్లవి 'విరాట పర్వం' సినిమాలో తన సోలో సీన్స్ అన్నీ పూర్తి చేస్తుందన్నమాట.