ఫ్లాప్ హీరోకి సల్లూ భాయ్ సాయం

సల్మాన్ ఖాన్ కొత్త సినిమా వచ్చేస్తోంది. జూన్ లో ఈద్ సందర్భంగా రేస్3ని రిలీజ్ చేయబోతున్నారు. ఈ పండుగ సల్మాన్ కు ఎంతగా అచ్చొచ్చిందో చెప్పాల్సిన పని లేదు. అందుకే ప్రతీ ఏటా ఈద్ నాడు సినిమాను విడుదల చేసేందుకు గట్టిగానే ట్రై చేస్తాడు సల్మాన్ ఖాన్.

అయితే.. రేస్3లో సర్ ప్రైజింగ్ గా అనిపించే మరో అట్రాక్షన్.. బాబీ డియోల్. ధర్మేంద్ర కొడుకు.. సన్నీ డియోల్ తమ్ముడు అయిన ఈ హీరో.. 1990లలో బాగానే హల్ చల్ చేశాడు. ఆ తర్వాత ఫ్లాపుల కారణంగా బాగా వెనుకబడిపోయాడు. ఇప్పుడు బాబీ డియోల్ తో సిక్స్ ప్యాక్ చేయించేసి మరీ తన సినిమాలో నటింపచేశాడు సల్మాన్ ఖాన్. ఈ పాత్ర కోసం బాబీ డియోల్ కి స్పెషల్ ట్రైనింగ్ ఇప్పించాడు సల్మాన్. బాగా బద్ధకస్తుడు అనే పేరున్న బాబీ డియోల్.. ఆ మధ్యన ఒళ్లు చేసేశాడు కూడా. అతడిని మార్చడం.. జిమ్ కు పంపి వర్కవుట్స్ చేయించి.. ఫిట్ గా ఉంచడం సన్నీడియోల్ కి.. తనకు కూడా సాధ్యం కాలేదని ధర్మేంద్ర చెబుతున్నారు.

ఇప్పుడు రేస్3 లో ఆఫర్ ఇవ్వడమే కాకుండా.. పట్టు పట్టి మరీ బాబీ డియోల్ లో మార్పు తీసుకురావడంతో.. ధర్మేంద్ర ఫుల్ ఖుషీ అయిపోతున్నారు. ఫ్లాప్ హీరో అనిపించుకున్న బాబీకి ఓ హిట్ ఇప్పించి మళ్లీ ట్రాక్ లో పెట్టే బాధ్యతను స్వచ్ఛందంగా సల్మాన్ ఖాన్ చేపట్టడం విశేషం. మరి ఈ రేస్3.. బాబీకి ఎలాంటి ఫలితాన్ని.. ఫ్యూచర్ ను ఇవ్వనుందో చూడాలి.