ఆమే గెల‌వాలంటున్న స‌ల్మాన్‌..

అమెరికా ఎన్నికల వేడి పతాక స్థాయికి చేరుకుంది. ఇంకో రెండు రోజుల్లోనే ఎన్నికలు జరగబోతున్నాయి. వచ్చే నాలుగేళ్లు శ్వేత సౌధంలో కూర్చోబోయేది హిల్లరీ క్లింటనా.. డొనాల్డ్ ట్రంపా అన్నది త్వరలోనే తేలిపోతుంది. రోజుకో రకంగా ఉంటున్న సర్వేలు జనాల్లో ఉత్కంఠ రేపుతున్నాయి. ఎవరు గెలుస్తారన్నది కచ్చితంగా చెప్పలేని పరిస్థితి. ప్రపంచవ్యాప్తంగా చాలామంది సెలబ్రెటీలు.. రేసులో ఉన్న ఇద్దరిలో ఎవరు తమ ఫేవరెటో వెల్లడిస్తూ.. తమను అభిమానించే అమెరికన్ ఓటర్లను ప్రభావితం చేయడానికి ప్రయత్నిస్తున్నారు. ఈ జాబితాలోకి మన సూపర్ స్టార్ సల్మాన్ ఖాన్ కూడా చేరాడు.

ఆయన అమెరికా అధ్యక్ష ఎన్నికల్లో తన మద్దతు హిల్లరీ క్లింటన్‌ కే అని తేల్చేశారు. హిల్లరీకి శుభాకాంక్షలు చెబుతూ.. ఆమె గెలవాలని ఆకాంక్షించాడు. రాజ్యాంగాన్ని అనుసరిస్తూ.. విలువలతో కూడిన పాలన అందించేందుకు మీకు ఆ దేవుడు శక్తినివ్వాలి.. అంటూ మరో వ్యాఖ్య జోడించాడు సల్మాన్. మన కండల వీరుడు పెట్టిన ఈ సందేశం కూడా అమెరికా అధ్యక్ష ఎన్నికల్లో అంతో ఇంతో ప్రభావం చూపిస్తుంది. ఎందుకంటే అమెరికాలో ఎన్నారైలు భారీ సంఖ్యలో ఉన్నారు. వారిలో కొందరిపై సల్మాన్ వ్యాఖ్యలు ప్రభావం చూపొచ్చు. ప్రియాంక చోప్రా లాంటి వాళ్ల మద్దతు కూడా హిల్లరీకి కలిసొచ్చేదే. దాదాపుగా మన ఎన్నారై ఓటర్లు హిల్లరీ వైపే ఉన్నట్లుగా కనిపిస్తోంది. పోరు హోరాహోరీగానే ఉన్నప్పటికీ గెలుపు హిల్లరీదే అవుతుందని తాజా సర్వేలు వెల్లడిస్తున్నాయి.

Like Us on Facebook : https://www.facebook.com/Tupakidotcom/