సెట్‌ కు వెళ్లి మ‌రీ ఖ‌రీదైన కారు ఇచ్చాడు

చేసిన సాయాన్ని మ‌ర్చిపోయేవారు చాలామందే కనిపిస్తారు. కొంద‌రు మాత్రం అందుకు భిన్నంగా చేసిన సాయానికి ఎంతోకొంత రుణాన్ని తీర్చుకునే ప్ర‌య‌త్నం చేస్తారు. సినిమాల‌కు సంబంధించినంత‌వ‌ర‌కూ బాలీవుడ్ కండ‌ల వీరుడు స‌ల్మాన్‌ కు మంచిపేరే ఉంది. నిజ జీవితంలో అత‌నిపై ప‌లు ఆరోప‌ణ‌లు.. విమ‌ర్శ‌లు ఉన్నా.. చిత్ర ప‌రిశ్ర‌మ‌లో మాత్రం అత‌డికి మంచి ఇమేజే ఉంది.

తాజాగా స‌ల్మాన్ న‌టించిన ట్యూబ్ లైట్ విడుద‌లై బాక్సా ఫీస్ ద‌గ్గ‌ర బోల్తా ప‌డ‌టం తెలిసిందే. ఊహించ‌ని రీతిలో ప‌రాజ‌యం పాలైన ఈ చిత్రంలో.. బాలీవుడ్ బాద్షా షారుక్ అతిథి పాత్ర‌లో న‌టించారు. ఫ్రెండ్లీగా న‌టించిన షారుక్‌ కు తాజాగా స‌ల్మాన్ ఒక స‌ర్ ప్రైజ్ గిఫ్ట్ ఇచ్చారు.

ముంబ‌యిలో షారుక్ న‌టిస్తోన్న‌ సినిమా షూటింగ్ స్పాట్‌ కు వెళ్లిన స‌ల్మాన్‌.. షారుక్ కు ఊహించ‌ని రీతిలో ఒక ఖ‌రీదైన కారును గిఫ్ట్ గా ఇచ్చి ఆశ్చ‌ర్య‌ప‌రిచార‌ట‌. ట్యూబ్ లైట్ లో అతిథి పాత్ర పోషించినందుకు కృతజ్ఞతగా ఈ ఖరీదైన కారును షారుక్‌ కు ప్ర‌జెంట్ చేసిన‌ట్లుగా చెబుతున్నారు.

ఆస‌క్తిక‌ర‌మైన విష‌యం ఏమిటంటే షారుక్ హీరోగా ఆనంద్ ఎల్‌.రాయ్ డైరెక్ష‌న్‌ లో ఒక సినిమా చేస్తున్నారు. ఇందులో స‌ల్మాన్ అతిథి పాత్ర పోషిస్తున్నారు. త‌న సినిమాలో గెస్ట్ రోల్ చేసిన షారుక్‌కు ఖ‌రీదైన కారును ఇచ్చిన స‌ల్మాన్‌ కు.. భ‌విష్య‌త్తులో షారుక్ ఎలాంటి గిఫ్ట్ ఇస్తారో చూడాలి.