టైగర్ సల్మాన్.. బతికే ఉన్నాడు

టైగర్ సల్మాన్ అంటే ఇంకెవరో అనుకునేరు.. ఇక్కడ మాట్లాడుతోంది బాలీవుడ్ సూపర్ స్టార్ సల్మాన్ ఖాన్ గురించే. మరి సల్మాన్ పేరు వెనుకు ఆ టైగర్ ఏంటి అంటారా? ఐదేళ్ల కిందట సల్మాన్ ‘ఏక్ థా టైగర్’ అనే సినిమా చేసిన సంగతి గుర్తుండే ఉంటుంది. యశ్ రాజ్ ఫిలిమ్స్ సంస్థ నిర్మించిన ఆ చిత్రం అప్పట్లో వసూళ్ల వర్షం కురిపించింది. దాదాపు 300 కోట్ల దాకా వసూళ్లు రాబట్టి సల్మాన్ బిగ్గెస్ట్ హిట్లలో ఒకటిగా నిలిచింది. కంటెంట్ యావరేజే అయినా.. వసూళ్లకు మాత్రం ఢోకా లేకపోయింది అప్పట్లో. ఇప్పుడీ చిత్రానికి సీక్వెల్ రాబోతోంది. ఆ సినిమా పేరు.. టైగర్ జిందా హై. అంటే టైగర్ బతికే ఉంది అని అర్థం.

‘ఏక్ థా టైగర్’కు కబీర్ ఖాన్ దర్శకత్వం వహిస్తే.. ఈసారి దర్శకుడిని మార్చేశాడు నిర్మాత ఆదిత్య చోప్రా. పోయినేడాది సల్మాన్ తో ‘సుల్తాన్’ సినిమా తీసి ఘనవిజయాన్నందుకున్న అబ్బాస్ అలీ జాఫర్ ‘టైగర్ జిందా హై’ని డైరెక్ట్ చేస్తాడు. ఫస్ట్ పార్ట్ లో నటించిన కత్రినా కైఫే రెండో భాగంలోనూ కథానాయిక. సల్మాన్ మాజీ ప్రేయసి అయిన కత్రినా.. ‘ఏక్ థా టైగర్’ తర్వాత మళ్లీ అతడితో నటించలేదు. ఇప్పుడు ఈ జోడీ మళ్లీ కనువిందు చేయడానికి రెడీ అయిపోయింది. తొలి భాగం కథ ఎక్కడ ఆగిందో అక్కడి నుంచే మొదలుపెడతాడట అబ్బాస్ అలీ. ‘సుల్తాన్’ సినిమాతో అతడి ప్రతిభేంటో అందరికీ అర్థమైంది. మరి వేరొక దర్శకుడు తీసిన సినిమాకు సీక్వెల్ చేయబోతున్న అబ్బాస్ తన ముద్రను ఎలా చూపిస్తాడో చూడాలి. ఈ చిత్రం ఈ మంగళవారమే సెట్స్ మీదికి వెళ్లింది. వచ్చే ఏడాది విడుదల చేస్తారు.

Like Us on Facebook : https://www.facebook.com/Tupakidotcom/